Энергетиклени жангы оборудованияны хайырланыргъа юйретгендиле

Шимал Кавказда регионла аралы сеть компанияны (МРСК СК) Ингушетияда, Шимал Осетияда, Къарачай-Черкессияда, Ставрополь крайда эмда Къабарты-Малкъарда бёлюмлерини специалистлерине деп «Каббалкэнергода» онкюнлюк окъутуу курс бардырылгъанды. Анда энергетиклени компания аз-аздан сингдире баргъан «Omni-UtilitieS» деген автоматизацияланнган информациялы системаны хайырланыргъа юйретгендиле.

Бу программа комплекс электрокючню терк эм тынгылы эсеплерге, къоранчланы да жик-жиги бла тергерге онг береди. Специалистле айтханнга кёре, аны сингдириу - ток бла жалчытыуну качествосун игилендирликди, компанияны бар керекли информация бла жалчытханлай турлукъду, статистика шартланы да терк жыйып жарашдырыргъа амал берликди. Ол а бары да компанияны ишине иги хайыр келтирликди, инвесторлагъа да аны иги жаны бла кёргюзтюрюкдю.

Системаны дагъыда бир игиси - ол токну эсеплеучю приборланы кёргюзтюулерин, алгъадача, журналгъа жаздыра турмай, жеринде суратха тюшюрюп, GPRS связь бла «Omni Utilities» программа комплексге жибереди.

Бахсан бла Лескен районлада электросетьледе бу система сынам халда ишлеп башлагъанлы талай заман болады. Бёлюмлени келечилери юй сайын барып, сагъынылгъан кёргюзтюулени планшет бла суратха тюшюредиле, ызы бла бирикген информация системагъа жибередиле. Ол а ким, къайда къаллай бир электрокюч кюйдюргенин толусунлай билдиреди.

Къабарты-Малкъарда сынамны энди компанияны Дагъыстанда бёлюмюнде да хайырланып башлагъандыла. «Электрокюч комплексни айнытыуда шёндюгю технологиялагъа бла оборудованиягъа таянмай боллукъ тюйюлдю. Ма ол себепден ишчилерибизни усталыгъын да кючлендире барыргъа тийишлиди», - деп белгилегенди «Каббалкэнергону» башчысы Муртаз Каров.