Къабарты-Малкъарда сабийлени эм жаш тёлю къымылдауну регион бёлюмю къураллыкъды

Озгъан ыйыкъда РФ-ни Президенти Владимир Путин Россейде сабийлени эм жаш тёлю къымылдауну юсюнден федерал законнга къол салгъанды. 20 июльда Артекде сабийлени эм жаш тёлю къымылдауну официал халда кёргюзтгендиле, къырал башчыбыз аны къарау советине оноу этерикди.

КъМР-ни Башчысы Казбек Коков жангы къымылдауну регион бёлюмюн къурауну юсюнден сорууланы республиканы жаш тёлюню ишлери жаны бла министри Азамат Люев эм «Право жаны бла юйретиу школа «Праволу республика» проектни оноучусу Аслан Шипшев бла  сюзгенди.

 «Жууукъ айлада кадрла, методика эм инфраструктура мурдорланы къурау бла уллу ишле тамамларгъа керекди. Битеу къыралда регион, жер-жерли эм биринчи бёлюмлери къураллыкъдыла. Ол жумушла бла байламлы бизни республикада ишле тири эм тохтаусуз бардырылыргъа керекдиле», - деп чертгенди Казбек Коков.

Республиканы оноучусу министрге битеуроссей къымылдаугъа терк окъуна тюшюнюрге эм аны программасына регион сегментни кереклисин буюургъанды. Республикалы бёлюмню жамауат штабына Аслан Шипшев оноу этерикди. Аны къырал, преподаватель эм жамауат  ишде да иги сынауу барды. Жамауат ишге республикада жашагъан тири эм башламчылыкъ бла кюреширге сюйген эм магъаналы жумушну тамамлауда бир жанында турмазлыкъ адамла керекдиле.   

Жангы къымылдауну магъаналы къауумуна школчула бла студентле кирликдиле, аны бла бирге ары дагъыда сабийлени ата-аналарыны жыйылыулары, юйретиучюле эм вожатыйле кирликдиле. Жаш тёлюню ишлери жаны бла министерствогъа сейирлери болгъан къырал органла бла эм жамауат биригиуле бла байламлыкъны тохташдырыргъа эм буюрулгъан жумушну тамамлап башларгъа буюруу берилгенди, деп билдиредиле КъМР-ни Башчысыны бла Правительствосуну пресс-службасындан.   

 

Бизни корр.

Поделиться: