Энергетикле къоранчланы азайтадыла

«Каббалкэнерго» къоранчланы кетерир ючюн тири кюрешгени себепли быйыл биринчи кварталда  1,1 миллиондан артыкъ киловатт-сагъатны аяргъа онг табылгъанды.   Ол а    Элбрус районну он кюнню, Тёбен Черек элни уа юч айны  ток бла жалчытыргъа жетерик эди.

Сёз ючюн, алгъаракълада Урван районда предприятияланы биринде эркинликсиз ток ызгъа къошулуп, бир ауукъ заманны аны хакъсыз хайырланып тургъанлары ачыкъланнганды. Энергокюч компанияны келечилери,  акт жазып,  ала  217  080 киловатт-сагъат ючюн тёлереге кереклисин билдиргендиле.

Компанияны келечилери  кертиси бла да  къаллай бир ток хайырланнганын билир ючюн,  юч айны ичинде  440 минг чакълы  счётчикни кёрюмдюлерин жазып алгъандыла. Рейдлени  чеклеринде ала  юйлени иелерине  токну урлау законнга бузукълукъ этгенден сора да, къоркъуусуз болгъанын да ангылатхандыла.

Тири профилактика иш  бардырылгъаныны хайырындан кёп заманны ток ючюн тёлемей тургъан  абонентлени   жюзден токъсаны борчларын жапхандыла. Эсге сала айтсакъ, бир кесилгенден сора, ток ызгъа экинчи кере къошулама деген адам аны ючюн  ахча берирге тюшерикди.  Кеси аллына къошулгъан  тазир тёлерге  керек боллукъду.  Сагъынылгъан амалла   электросеть комплексни ишин тийишли халда бардырыргъа  себеплик этедиле.  

«Каббалкэнерго»  сетьледе аварияла, къоранчла болмазча, кемчиликле  да   заманында тамамланырча  кёз-къулакъ болгъанлай турады.