Продукцияларын кёргюзтгендиле, алчы технологияла бла да шагъырейленнгендиле

Бу кюнледе Азербайджанны ара шахары – Бакудагъы  Экспо Арада аш-азыкъны 25-чи халкъла аралы кёрмючю - WorldFood Azerbaijan 2019 бардырылгъанды. Анга Россейден, Украинадан, Литвадан, Хорватиядан эмда кёп башха къыралладан эки жюзден артыкъ компания бла предприятие къатышхандыла. Миллет стендлерин а бизни къырал, Беларусь, Италия, Турция эм Шри-Ланка хазырлагъан эдиле.

  Къабарты-Малкъардан анда продукцияларын «Источник» ООО (гара суула), «Радуга» ООО (сокла), «КФХ Орзалиева Майя Назировна» (картоф урлукъ) кёргюзтгендиле. Алагъа ары барыргъа уа республиканы предпринимательствогъа себеплик этиу арасы болушханды, деп билдиргендиле КъМР-ни Экономиканы айнытыу министерствосундан.

Кёрмючде татлы ашарыкъла, сют эмда эт  продукция, жемиш суула, чай, кофе, тютюнле, кёгетлени  жарашдырыучу оборудование, производстволу конструкцияла эмда кёп башха затла кеслерине орун тапхандыла. Предпринимательлеге быллай магъаналы ишге къатышыу – жангы рыноклагъа чыгъаргъа, продукцияларына асламыракъ алыучу табаргъа, ала къармашхан сферада ахшы сынам, технологияла, амалла бла да шагъырейленирге онг береди.