Ата журтну юлгюлю инсанлары болургъа ант этгендиле

19 майда, В.И. Ленинни атын жюрютген пионер организациягъа 95 жыл болгъаны бла байламлы, Москвада Къызыл майданда къыралны жер-жерлеринден келген тёрт мингден артыкъ сабий пионерлени жыйынларына киргендиле. Аланы араларында Къабарты-Малкъардан баргъан жашчыкъла бла къызчыкъла да болгъандыла.

Пионер галстукланы сабийлеге РФ-ни коммунист партиясыны Ара комитетини башчысы Геннадий Зюганов, биринчи, экинчи секретарьлары, Къырал Думаны, Москва шахарны эм областьны думаларыны коммунист партиядан депутатлары къысхандыла.

Бу иш къыралда тёрели бола барады. Быйыл Москвагъа бу ариу жумуш бла республиканы жаш ленинчилеринден шахар, район школлада окъугъан жыйырма бла бир сабий баргъандыла. «Ал жыллада бизден быллай къууум бла баргъанланы саны отузгъа окъуна жетиучю эди, - дегенди РФ-ни коммунист партиясыны Нальчикде шахар комитетини экинчи секретары Евгения Шидакова. – Быйыл ишибиз ашыгъышлы болуп, кёп сабийни хазырлап  чыгъаралмагъанбыз жолгъа». Делегациягъа Лескен районда коммунист партияны келечиси Рита Далелова таматалыкъ этгенди. Аны болушлукъчусу болуп Нальчикден Карданланы Люба баргъанды.

Республиканы коммунистлери Борис Паштовну башламчылыгъы бла быллай сабий организацияны къураугъа уллу эс бурадыла. Ата-аналарыны, ынналарыны, аппаларыны заманларындача, ары киргенлени туугъан жерге сюймекликлери энчиди. Ала ата журт, бирлик, инсан борч дегенча сыйлы затланы магъаналарын терен ангылайдыла. Сабийлени пионерге, комсомолгъа кирирге итинирге, бу халда юйретиуге, Чабдарланы Любаны айтыууна кёре, юйде альбомлада сакъланнган суратла, ол заманны юсюнден таматала айтхан эсгериу хапарла кёллендиредиле.

«Ары баргъан кюнюбюз, аланы сыйларына жыйылгъан уллу адамла сабийлени эслеринде ёмюрге къаллыкъдыла. Къууанчлы линейкада, пионерлени къызыл байракълары да аязда шууулдай, ол тёрт минг сабий бирден пионер антны айтхандыла: тамата тёлюню иги тёрелерин мындан ары да тохтатмай элтирге, урушну эм урунууну ветеранларына, къартлагъа, къарыусузлагъа болушургъа, Ата журтну юлгюлю адамлары болургъа сёз бергендиле.

Ызы бла Россейни компартиясыны башчысы Геннадий Зюганов жангы пионерлени алгъышлап, алагъа бир къауум насийхат сёз айтханды, бу биригиуню тола баргъанына къууаннганын да билдиргенди. Ол пионерлени белгилери – къызыл галстук Хорлам Байракъны кесегиди, сиз аны боюнугъузда жюрютюрюксюз деп ёхтемлендиргенди жангы пионерлени.

РФ-ни комсомол биригиуюню ара комитетини биринчи секретары Владимир Исаков да бюгюн былайгъа келген жаш адамла Ленинни тюзлюк жолунда биринчи атламла этгенлерин, алда аланы комсомол сакълагъанын эсгертгенди. Дагъыда болгъандыла алгъышлаула. Байрам а Дунаевский атлы сабий ансамбльни тепсеулери, жырлары бла бошалгъанды. Сора, тёреде болгъаныча, Ленинни Мавзолейине да кирип, гюлле салгъанбыз», - дегенди Люба.

Ол кюн Къызыл майданда жангы пионерлени жыйынларына кирген Чабдарланы Ислам: «Пионер болгъаныма ёхтемленеме. Бери келген нёгерлерими хар бири да бу кюннге жетишир ючюн иги окъургъа, ариу къылыкълы болуп, таматаланы ыразы этерге кюрешгенбиз, - дейди. – Пионерияны юсюнден а манга биринчи анам айтханды. Мен къыралыма, халкъыма жараргъа сюеме».

Ары баргъан сабийле алда айтылгъан ансамбльни келечилери бла бирге эски пионер жырланы айтхандыла: «Взвейтесь кострами, синие ночи», «Солнечный круг», «Когда мои друзья со мной», «Орлята учатся летать», «Широка страна моя родная» эм башхала. Быллай къууанчлы тюбешиуле Къабарты-Малкъарны районларында, эллеринде да болгъандыла.