Элбрус райондан

 

Бу кюнледе Элбрус районну халкъны социал жумушларын жалчытхан комплексли арасында солугъан абадан адамланы араларында кёчгюнчюлюкню сынагъанла, урунууну ветеранлары эм сабийликлери Уллу Ата журт урушну кезиуюне тюшгенле да бардыла.  

 

Алада къонакъда Коммунист партияны жер-жерли бёлюмюню биринчи секретары Хасаитланы Лиза болгъанды. Ол солугъанла арада заманларын къалай ётдюргенлерине къарагъанды эм аланы талайын къууанчлы халда «Урушну сабийлери» майдалла бла саугъалагъанды.

 

 

Элбрус району сабийлени эм жаш тёлюню чыгъармачылыкъларыны Мокъаланы Магометни атын жюрютген арасында «Сабийликни аламы» деген байрам бардырылгъанды, ол тёрели халда окъуу жылны ахырында къуралыучуду. Сабий чыгъармачылыкъ биригиулеге жюрюгенле аны кезиуюнде окъуу жылны ичинде неге юйреннгенлерин кёргюзтгендиле. Къонакъла галереяда аланы суратларына къарагъандыла, сахна оюнларын, музыка эм тепсеу номерлерин кёргендиле. 

 

Выпускниклеге окъууну бошагъанларыны юсюнден шагъатлыкъ къагъытла берилгендиле, айырмалы болгъанла уа грамотала бла да белгиленнгендиле. Араны устазларына ишлерин тынгылы тамамлагъанлары ючюн грамотала эм саугъала берилгендиле. Учрежденияны ишине тири къатышхан ата-анала да ыразылыкъ къагъытла эм саугъала къоллу болгъандыла.