КъМКъУ-ну алимлери тыш къыралла бла байламлыкъла къурайдыла

Алгъаракълада  гитче эм орта бизнес бла байламлы  тёрт жюзге жууукъ  компанияны келечилери,  Россейни, Узбекистанны эмда Ара Азияны къыралларыны билим бериу учреждениялары «Expo-Russia Uzbekistan 2019» деген  экинчи  халкъла аралы промышленный кёрмючге эмда аны чеклеринде  бизнес форумгъа къатышхандыла.

Мында  энергетика, машинала ишлеу, автомобиль эм темир жол транспорт, къурулуш, эл мюлк, нефть, газ, химия промышленность, медицина эм фармацевтика, телекоммуникацияла, информациялы технологияла, билим бериу  бёлюмле бла байламлы  ишле  кёргюзтюлгендиле.  Анга  Къабарты-Малкъар къырал университетни атындан  Прогрессив материалланы бла аддитив технологияланы арасы да  къатышханды. Аны чеклеринде бардырылгъан  бизнес-форумда  Къабарты-Малкъарны жашаууну, республиканы  айнытыуда  КъМКъУ- ну магъанасыны, университетде къаллай тинтиуле этилгенлерини,  вузланы, илму тинтиу институтланы эм бизнеслени  арасында   байламлыкъланы  юсюнден аны илму жаны бла проректору Светлана Хаширова сёлешгенди.

«Тёгерек столгъа» къатышханла бизни вузну  илму жаны бла жетишимлерине уллу багъа бергендиле. Аны бла бирге жерлешлерибизни  арада байламлыкъны кючлеуню сюзерча,  быйыл октябрьде Узбекистанны Промышленный эмда сатыу-алыу палатасында ётерик кенгешге чакъыргъандыла. Форумда КъМКъУ бла Ташкентни  химия технологияла жаны бла илму тинтиу институту илму-техника жаны бла байламлыкъда ишлерге келишгендиле.

Ахырында къонакъла   Узбекистанны автомобиль промышленностьха керекли затла чыгъаргъан предприятиясында да   болгъандыла. Аны таматасы бла Светлана Хаширова келир заманда полимерден компаундла  къурап башлауну юсюнден келишим этерге айтхандыла.  

«Expo-Russia Uzbekistan 2019» форум Россейни бла Узбекистанны Тыш къыралла бла ишлени,  Промышленность эмда сатыу-алыу, Экономиканы айнытыу, Эл мюлк, Жарыкъландырыу, илму эмда жаш тёлюню  ишлери жаны бла министерстволарыны, башха ведомстволарыны да себепликлери бла  бардырылгъанды.