Къырал Думаны депутаты жарсыуланы кетерирге сёз бергенди

РФ-ни Къырал Думасыны депутаты Геккиланы Заур Зольск районда болгъанды, районну Жер-жерли самоуправление советини депутатлары эмда активи бла тюбешгенди. Жыйылыугъа районну башчысы Руслан Гятов да къатышханды.

Заур Далхатович «Единая Россия» партияны генеральный советини секретары Андрей Турчакны башламчылыгъы бла жарашдырылгъан законланы проектлери биринчи окъулууда къабыл нек кёрюлгенлерин ангылатханды. Аладан биринде элледе депутатланы (ала хакъ алып ишлемей  эселе) файдаларын ачыкъ этиуню низамын женгиллетиуню юсюнден айтылады. Экинчисинде уа - терс неда толу болмагъан шартланы кёргюзтгенлени жууапха тартыуну юсюнден.

Къырал Думаны депутаты Зольск районда бир-бир партия проектле жашауда жетишимли бардырылгъанларына эс бургъанды. Ол санда «Жер-жерли Маданият юй», «Шахар хал», «Сабий спорт».  Тюбешиу ачыкъ бардырылгъанын белгилерчады. Аны кезиуюнде районнга магъаналы соруула сюзюлгендиле.

- Элледе бек уллу жарсыу – ичер сууну къытлыгъыды, - дегенди районну администрациясыны таматасы Руслан Гятов. Ол депутатдан ол жумушну тамамларгъа болушлукъ тилегенди.  Сёз Сармаково элде 320 окъуучугъа жангы школ ишлетиуню юсюнден да баргъанды. Залукокоажеде сууну тазалаучу оборудованияны жангыртыуну проблемасы да сюзюлгенди.

Заур Далхатович Зольск районну оноучуларына эмда активге, бирге келишип, тири ишлегенлери ючюн ыразылыгъын айтып, мындан ары да жетишимле тежегенди. Ол тюбешиуде айтылгъан кемчиликле бла предложенияла толтуруллукъларына сёз бергенди, бу ишге Къабарты-Малкъарны Къырал Думада депутатлары да къошуллукъларын чертгенди.