Электрокючню къоркъуусузлу хайырланыуну юсюнден

«Россети Шимал Кавказ» компанияны Къабарты-Малкъарда бёлюмюню специалистлери электрокючню къоркъуусузлу хайырланыргъа юйретген, кеси да школчулагъа деп къуралгъан кезиулю дерслерин бардыргъандыла. Алай бла, кёп болмай, ала Нальчикде «Тейри къылыч» санаторийде болгъандыла. Шёндю ол учрежденияда кесибизде районладан сабийле бла бирге Донецк Халкъ Республикада Макеевка шахардан келген 35 сабий солуйду.

Энергетикле алагъа электрокюч приборланы хайырланыуну юсюнден оюн халда хапарлагъандыла, электрокюч бла ишлеген объектлени къатларында кеслерин къалай жюрютюрге кереклисин да ангылатхандыла. Аллай тийреледе къоркъуу болгъаныны юсюнден къаллай билдириуле орнатылыучусун да кёргюзтгендиле.

Сабийле токну юсюнден не зат билгенлерин викторинада ачыкълагъандыла. Энергетикле алагъа дагъыда жаралы болгъан адамгъа биринчи медицина болушлукъну къалай берирге кереклисин кёргюзтгендиле.

Дерсде айтылгъан эмда кёргюзтюлген хар неге да сабийле уллу эс буруп тынгылагъандыла. Специалистле бла бирге «Гоша» деген тренажёрну юсюнде ток ургъан адамгъа къалай болушургъа боллугъун да кеси кёзлери бла кёргендиле.

«Тейри къылычда» жыл сайын 3,5 минг сабий солуп кетеди. Энергетикле анда хар жангы смен бла тюбеширге, адамны жашаууна терен сингнген электрокючню хайырыны бла хатасыны юсюнден толу хапар билдирирге кюрешедиле.

 

Улбашланы Мурат.
Поделиться: