Энди республиканы школларында къырал байракъ кётюрюллюкдю эмда къырал гимн эшитдирилликди

 КъМР-ни Башчысы Казбек Коков Правительствону юйюнде КъМР-ни Терроризмге къажау комиссиясыны бла Оператив штабыны жыйылыуларын бирге бардыргъанды.

Баш соруулагъа кёчерни аллында, Казбек Коков республиканы школларында къырал байракъны кётюрюуню эмда къырал гимнни эшитдириуню тёресин кийирирге буюргъанды. Биринчи болуп къырал байракъла 1 майда  анга хазырланнган школлада кётюрюллюкдюле. Андан сора уа, хазыр болгъанларына кёре, ол тёрели иш битеу мектепледе да дайым бардырыллыкъды.  «Президентибиз Владимир Владимирович Путин айтханыча, бу иш  къыралыбызны ол сыйлы белгилерине  тийишлиликде бийик даражада бардырылыргъа керекди», - деп чертгенди Къабарты-Малкъарны Башчысы.
Андан сора  транспортну эмда аны инфраструктурасын террорчулукъ ишледен  къоруулауну амалларыны юсюнден сёлешиннгенди. КъМР-ни транспорт эмда жол мюлк министри Аслан Дышеков хауа эмда темир жолла бла байламлы объектле, автовокзалла да  видеокамерала бла жалчытылгъанларыны (180 камера салыннганды), ала «Къоркъуусуз республика» АПК-ны системасына эмда полицияны дежурный бёлюмюне къошулгъанларыны юсюнден билдиргенди.

Ызы бла Росгвардияны КъМР-де Управлениясыны таматасы Сергей Васильев, КъМР-ни промышленность, энергетика эмда сатыу-алыу министри Шамиль Ахубеков бла КъМР-ни курортла эмда туризм министри Мурат Шогенцуков  отлукъ-энергетика, санатор-курорт эмда турист-реакреация комплекслени, сатыу-алыуну объектлеринде террорчулукъ ишледен сакъланыу къалай къуралгъаныны юсюнден билдириуле этгендиле. Алагъа  тынгылап бошагъандан сора, республиканы оноучусу ол ишни  кючлендирирге эмда Терроризмге къажау комиссияны оноуларын толтуруугъа бютюн жууаплы кёзден къараргъа буюргъанды.

 Жыйылыуда дагъыда   май байрамланы кезиуюнде право низамны сакълау эмда къоркъуусузлукъну жалчытыу жаны бла не мадарла этилгенлерине да къаралгъанды. Хорламны 77-жыллыгъына аталгъан къууанчлы ишле, Жаз башыны бла Урунууну байрамы бардырыллыкъ жерледе къоркъуусузлукъ  къалай бла жалчытыллыгъыны  юсюнден кюч структураланы бла право низамны сакълаучу органланы келечилери билдиргендиле. КъМР-ни маданият министри Мухадин Кумахов а байрам ишлени программасы бла шагъырейлендиргенди.
Казбек Коков  Ёлюмсюз полкну бардырыугъа хазырланып башларгъа буюргъанды, быйыл эпидемиология хал бу  магъаналы ишни очно ётдюрюрге  онг бергенин да чертгенди. «Биз Ёлюмсюз полкну кенг халда ётдюрлюгюбюзге хазырланыргъа керекди», - деп къошханды ол.
 Бирикген жыйылыугъа КъМР-ни Правительствосуну Председатели Мусукланы Алий,  КъМР-ни  Башчысыны Администрациясыны  таматасы Мухамед Кодзоков,  РФ-ни Президентини СКФО-да толу эркинликли келечисини аппаратыны баш федерал инспектору Тимур Макоев, министерстволаны бла  ведомстволаны оноучулары, Муниципал къуралыуланы администрацияларыны, регионну право низамны сакълаучу органларыны башчылары къатышхандыла.

 

Поделиться: