Промышленностьну айнытыугъа энчи эс бёлюннгенди

Къабарты-Малкъар Республиканы Башчысы Казбек Коков Россей Федерацияны Къырал советини экономика соруула эм жангы коронавирус жукъгъан аурууну жайылыууна къажау ишчи къауумуну селектор кенгешине къатышханды. Аны къауумну таматасы Сергей Собянин эм Россейни Правительствосуну Председателини биринчи орунбасары Андрей Белоусов бардыргъандыла.

Ишчи къауумну жыйылыууна толтуруучу властьны федерал органларыны таматалары эм Россей Федерацияны субъектлерини оноучулары къошулгъандыла. Регионлада бла къыралда саулай санкцияла басынчакълыкъ халлада социал-экономика болумну мониторингини шёндюгюлю эсеплери сюзюлгендиле.

Аслам эс промышленностьха себеплик этиуге бёлюннгенди. Сёз, алып айтханда, магъаналы промышленный предприятияланы эм жашау журт-къурулуш комплексни организацияларыны процент ставкаларыны субсидированиясыны юсюнден баргъанды. Къабарты-Малкъардан магъаналы предприятияланы федерал тизмесине «Терекалмаз» завод къошулгъанды.

Россейни Правительствосуну промышленностьну айнытыу регион фондланы докапитализацияларыны юсюнден басмаланнган буйругъуна кёре магъаналыланы тизмесине кирмеген предприятиялагъа льготалы кредитование онглагъа къаралгъанды. Регионла промышленностьну айнытыу фондларыны докапитализацияларын Правительствону резерв фондларындан бёлюннген федерал ырысхыгъа бардыраллыкъдыла. Аны хайырындан предприятияла кеслерини оборот ырысхыларын толтурурча учуз кредитле алаллыкъдыла, ишчи жерлерин эм продукцияны чыгъарыу ёлчемлерин сакълаяллыкъдыла.

Республиканы кредит-финанс организациялары предпринимательлеге «Антикризисная», «Инвестиционная», «Оборотная», РФ-ни Минэкономразвитиясыны 1764 Программасы, РФ-ни Эл мюлк министерствосуну «Оборот кредитованияны программасы» эм «Инвестициялы кредитованияны программасы» кёллендириу кредитование программаланы чеклеринде жумушланы тапдырыу ишни бардырадыла.

Кенгешде, андан сора да, регионланы гитче эм орта бизнесге билеклик этиу къошакъ халлы оюмларын да сюзгендиле. КъМР-ни Гарантиялы фонду жылны аллындан предпринимательствону гитче эм орта бизнес субъектлерине битеу бирге 57,8 миллион сом болгъан 6 поручительство бергенди, фондну поручительствосуна кёре тохташдырылгъан кредит келишимлени ёлчеми 150 миллион сомдан артыкъ болгъанды. КъМР-ни микрокредитование фонду битеу да бирге 21 миллион сом чакълы бир болгъан 39 займ бергенди. Андан сора да, 24 заёмщикге кредит къайтарыу борчларын толтурууну алты айгъа дери тохтатырча онг этилгенди.