Къырал статистика жаны бла болумну сюзгендиле

КъМР-ни Башчысы Казбек Коков Шимал -Кавказ федерал округну Къырал статистика управлениясыны федерал службасыны таматасыны орунбасары  Аурика  Гаштова бла ишчи тюбешиу бардыргъанды. Аны кезиуюнде  республиканы статистика службасыны былтыр  ишини эсеплери сюзюлгендиле.

 Управление тамамлагъан магъаналы жумушладан бири былтыр  15 октябрьден тебиреп 14 ноябрьге дери халкъны санын  жазыуну  баргъаны  болгъанды. Ол кезиуде, тёрели амалладан сора да, цифралы технологияла да хайырланнгандыла. Белгилерчады: волонтёрла халкъны  жазыу кампания башланырны  аллында билим да алып, адамлагъа планшетлеге  шартланы  тюшюрюрге болушуп айланнгандыла.  Ол ишни Къырал жумушланы сайтына кирип, анда тамамлап да тургъандыла.

Жазыу кампанияны эсеплери толтуруучу власть  органлагъа стратегиялы оноуланы чыгъаргъанда  аланы  хайырланыргъа онг береди. Ала асламысында социал магъаналы программаланы, экономиканы айнытыу жаны бла проектлени эм къурулуш  инфраструктура планланы жарашдыргъанда  жолланы, юйлени, мектеплени, сабий садланы ишлегенде, газ  быргъыланы, ток ызланы алышындыргъанда эм жамауат транспортну айнытыуда   керек болгъан  къагъытланы хазырлай туруп хайырланадыла.

Юсюбюздеги жылны биринчи кварталында  тюрлю-тюрлю амалла бла  жыйышдырылгъан  билдириулени качествосуна эм къалай  алыннганларына контроль этилгенди. Росстат халкъны санын  жазыу кампанияны биринчи кёрюмдюлерин Россей Федерацияны субъектлеринде апрельде басмаларыкъды. Аны ызындан тюрлю -тюрлю бёлюмлеге  жораланнган ахыр билдириу  басмада чыгъарыкъды, дегенди Аурика Гаштова.

 Этилген оноугъа кёре,  жазыу кампанияда  хайырланнган 2 мингнге жууукъ планшетден билдириуле  кетерилгенден сора, ала  республиканы врачларына бла устазларына ишде хайырланыргъа берилликдиле, деп билдиреди республиканы оноучусуну пресс-службасы.