Темир жол водительлени жунчутады

Нальчикде Идаров  бла Суворов орамла бирге къошулгъан жерде  темир жолну переездини  иги да  тозурагъаны водительлени   эрттеден бери жунчутады. Былайгъа  ремонт этилмегенли бир  жылдан   аслам болады.  Аны  эки жанында да  чунгурла  асыры кёпден, техниканы аяргъа, акъырын барыргъа тюшеди. Ол себепден жолну  «Дубки» микрорайоннга баргъан жаны  Суворовдан Къабарты орамгъа дери  кюнню узуну  машиналадан толгъанлай   туруучуду. Кёп болмай  былайда болумну видеогъа  тюшюрюп,  Интернетге   салгъандыла. Аны юсюнден шахарны таматалары да оюмларын билдиргендиле. 

 - Переезд Россейни темир жолларыны биригиую (РЖД) къарагъан объектге киреди. Былайгъа ремонт этерге керек болгъаныны юсюнден эсгертип, алагъа эки письмо  жибергенбиз. Жууукъ заманда  тапландырыу ишле башланыргъа керекдиле, - деп билдиргендиле Нальчикни мериясыны пресс-службасындан.