Жууукъ Кюнчыгъышдан – Элбрусха

КъМКъУ-да Жууукъдагъы Востокдан  келип окъугъан 50 студент Элбрусда Уллу Ата журт урушда жоюлгъанланы  3500 метр бийикликде орналгъан эсгертмелерине гюлле салгъандыла. Бу акция КъМР-ни Жарыкъландырыу, илму эмда жаш тёлюню ишлери жаны  бла министерствосуну башламчылыгъы бла Уллу Хорламны байрамына жораланып бардырылгъанды.
Университетни тарыхдан преподаватели Анжела Журтова 1942 жылда августну орталарында былайлада совет аскерчиле «Эдельвейс» дивизия бла къаты сермешгенлерини юсюнден айтханды. Ол заманда Гитлер хорламына саулай дунияны ийнандырыр ючюн  Минги тауну башында Германияны байрагъын орнатыргъа буюргъанды. Болсада къаты къазауатладан сора, фашистле  адамларыны иги кесегин тас этип, тауланы къуршалагъанларын къоядыла. 1943 жылда уа 13 февральда  немислилени белгилерин кетерип, аланы орунуна  СССР-ни  байрагъы салыннганды.
Быллай акцияла Къабарты-Малкъарны хар районунда да бардырыллыкъдыла.