Элбрус курортну айныууну юсюнден соруулагъа къарагъандыла

КъМР-ни Башчысы Казбек Коков Кавказ.РФ акционер обществону таматасы Хасан Тимижев бла ишчи тюбешиу бардыргъанды. Аны кезиуюнде «Эльбрус» курортну айнытыу жаны бла соруула сюзюлгендиле эм Къабарты-Малкъарда башха инвестиция проектле къалай тамамланнганларына къарагъандыла. 

Республикагъа келген туристлени орнатыу бла байламлы инфраструктураны къурау, санкцияланы салгъанларына да къарамай, баш борчларыбыздан бирлери болгъанлай къалады. Жууукъ заманда Азау ёзенни тапландырыу жаны бла ишле башланырыкъдыла, ол санда машиналаны салыучу жер да ишленирикди, деп билдиргенди Хасан Тимижев.

 Андан сора республиканы курортларында къоркъуусузлукъну жалчытыу  жаны бла соруула сюзюлгендиле.   Хасан Тимижев  Къабарты-Малкъар Республиканы Башчысына кёп болмай Москвада РФ-ни МЧС-ни таматасы Александр Чуприян бла тюбешгенини  юсюнден айтханды.   Анда сёз туристлени бла альпинистлени къоркъуусузлукъларын жалчытыуну, жолоучуланы къаллай бир келгенлерин эсепге алыуну, контроль этиуню эм алгъын таулада болгъан приютланы жангыдан къурауну юсюнден баргъанды.  

Тюбешиуню кезиуюнде туризмни айнытыугъа себеплик этерик инвесторланы чакъырыуну юсюнден да сёлешиннгенди.

«Республиканы курортларын тапландырыу эм алагъа адамла сюйюп келирча жарашдырылгъан проектлеге болушлукъ берликбиз»,  -  дегенди Казбек Коков. 

 

 

 

 

Бизни корр.
Поделиться: