Бу жол алчылыкъ – «ветеринарлада»

Къабарты-Малкъар къырал аграр университетде жылны ичинде бек сейирлик эмда хар ким да ашыгъып сакълагъан  «Студент жаз башы»  фестиваль болгъанды.  Быйыл  биринчилик «агрономладан»  «ветеринарлагъа» кёчгенди.
Хар замандача, бу жол да факультетле барысы да  командаларын чыгъаргъандыла. Биринчи кюн  механизация эм предприятияланы энергия бла жалчытыу, ветеринар медицина эм биотехнологияла, сатыу-алыу технология факультетле эмда орта профессионал билим берген бёлюмню келечилери  кёп жаны бла усталыкъларын кёргюзтгендиле. Экинчи кюн  сахнагъа  къурулуш эмда жерни тапландырыу, агрономия, экономика эмда  управление факультетле чыкъгъандыла. 

Алагъа багъаны уа чынтты устала бергендиле: жюрини таматасы – КъМКъАУ-ну  ректоратында  кенгешчи, профессор Мухаммед Шахмурзов,   композитор, продюсер Анзор Хаупа, Искусстволаны Шимал-Кавказ къырал институтуну  культура колледжини хореография бёлюмюню таматасы,  «Глория»   тепсеу ансамбльни художестволу башчысы  Диана Карцева, актёр эм блогер Казбек Качлаев,  «Ла Стэла»  араны баш директору, продюсер Марьяна Казанова, агровузну юйретиу  эм социал иш жаны бла управлениясыны таматасы  Аскерхан Шхагапсоев.
Фестиваль бу жол театргъа жораланнганды. Командаланы хар бири да бешишер  номерни 35 минутну ичинде  кёргюзтюрге керек эдиле.

Артыкъ кёп заман берилмегенине да къарамай, ала бир бирге ушамагъан, алай эс бурурча  сейирлик программаларын кёргюзтгендиле. Аланы  ичинде  сахна оюн, чам, лакъырда, жыр, тепсеу да кёп эдиле. Биринчи жерге тийишли болгъанны сайлагъан тынч болмагъанды, нек дегенде командала барысы да кючлю болгъандыла.

Алай жюри сайлауун этмей къоймагъанды: биринчи жерге ол  ветеринар медицина эм биотехнологияла факультетни тийишли кёргенди. Экинчиге уа  энчи орта профессионал билим берген бёлюм чыкъгъанды, ючюнчю жер а къурулуш эм жерни тапландырыу  факультетге жетгенди. Хорлам болдургъан командала ахча къоллу болгъандыла.

Студентлени байрамлары  къуралыулу эм сейирлик ётгенин да белгилерчады. Окъуу юйню жыйылыула бардырылыучу залында  адам асыры кёпден, сюелир  жер окъуна болмагъанды. Ала хар командагъа  толкъун къарсла бла  тюбегендиле. Ол  а  факультетлени араларында  шуёх байламлыкъла уллу болгъаныны шагъатыды.