Битеуроссей конкурсха барлыкъла сайланырыкъдыла

Озгъан байрым кюн Бахсан шахарны 4-чю номерли школунда «Россейде жылны устазы -2019» деген Битеуроссей конкурсну регион кесеги къууанчлы халда ачылгъанды. Анга аталгъан жыйылыугъа   КъМР-ни жарыкъландырыу, илму эмда жаш тёлюню ишлери жаны бла  министри Ауэс Кумыков,  КъМР-ни Парламентини Билим бериу, илму эмда жаш тёлю политика жаны бла комитетини председатели Светлана Азикова,  Бахсан шахар округну жер-жерли администрациясыны башчысы Хачим Мамхегов, башха къуллукъчула бла тюрлю-тюрлю районладан келген  къонакъла да къатышхандыла.

Ызы бла конкурсантланы  Светлана Азикова алгъышлагъанды, аланы хар бири да жетишимли болурун сюйгенин билдиргенди. Ауэс Кумыков  а  бери келген устазлагъа хорлам тежеп, эришиулени битеуроссей кесегине сайланнган педагог Къабарты-Малкъарны атын айтдырлыгъына ийнаннганын айтханды. Министр Бахсан шахарны администрациясына, мектепде ишлегенлеге да  конкурсну бардырыргъа себеплик этгенлери ючюн  жюрек ыразылыгъын билдиргенди. 

Хачим Мамхегов а Бахсан районда билим бериуге энчи эс бурулгъанын айтып, анга  бюгюн конкурсха къатышханланы араларында  аланы шахардан устаз да болгъаны шагъатлыкъ этгенин эсгертгенди.

Андан сора  конкурс  башланнганды. Быйыл анга 13 адам къатышады. Ала республиканы  районларыны асламысыны эмда Нальчик шахарны келечилеридиле.  Аланы араларында  Къашхатаудан  географиядан устаз  Манияланы Аминат,  Тырныаууз шахарны 1-чи номерли мектебинден Мирзойланы Наталья эмда Нальчикде 32-чи номерли орта школну орус тилден бла литературадан устазы Хачаланы Светлана бардыла. 

Ол кюн устазла кеслерини эмда дерслерини юслеринден   къысха билдириуле этгенлери бла чекленнгендиле. Бу ыйыкъда уа ала тюрлю-тюрлю номинациялагъа къатышырыкъдыла. Алагъа даражалы жюри багъа бичерикди. Анга уа Светлана Азикова, КъМР-ни жарыкъландырыу, илму эм жаш тёлюню ишлери жаны бла министрини орунбасары  Ирина Шонтукова, КъМКъУ-ну проректору Артур

Кажаров (жюрини председатели),  халкъгъа билим бериуде эм илмуда  ишлегенлени профсоюзларыны  республикалы комитетини председатели Сергей Карныш, «Къабарты-Малкар» ВТК-ны директору Наталья Конорева, Битеуроссей халкъ фронтну регион штабыны сопредседатели Хутуйланы Люба,  Искусстволаны Шимал-Кавказ къырал институтуну проректору Эфендиланы Фуад эм башхала киредиле. 

Байрам жырсыз, тепсеусюз да болмайды. Ол жаны бла усталыкъларын  4-чю номерли орта школну  окъуучулары, устазлары да аямагъандыла.

Битеуроссей конкурсну регион кесеги  Къабарты-Малкъарда бардырылгъанлы быйыл 30 жыл болады. Аны мураты - фахмулу, ишлерин сюйген, аны тынгылы билген устазланы ачыкълауду эмда педагогну даражасын кётюрюудю.