Миллет ашарыкъларыбызны кёргюзтгендиле

Озгъан ыйыкъда Минги тауну этегинде «Ашхананы Бийчеси бла Патчахы-2022» деген сабий конкурсну быйылгъы кезиую озгъанды. Анга къатышханладан тёрт къызчыкъ бла жашчыкъ финалгъа чыкъгъандыла. Бу жол ала Элбрус посёлканы Маданият юйюнде жыйылгъандыла. Эсигизге салайыкъ, быйыл бла бу эришиу бешинчи кере бардырылады. Анга жыл санлары онекиден атламагъан сабийле къатышыргъа боладыла.

Былайда алгъадан жашчыкъла эки болургъа кереклисин белгилерчады. Алай аладан бирини конкурс ётген кюннге спорт эришиую тюшгени себепли, аш-суугъа усталыгъын кёргюзтюр онгу болмай къалгъанды.

Ол себепден, бу жарыкъ, татлы байрамгъа быйыл бешеулен къатышхандыла. Ала кёнделенчи Оракъланы Къууанч, лашкутачы Насталаны Динара, бедикчи Къулийланы Милена, тырныауузчу  Искандерланы Лаура эм элбрусчу Хаджиланы Назиля эдиле. Бу жолгъу эришиуню финалына чыкъгъанла барысы да Басхан ауузуну келечилери болгъандыла.

Конкурсха къатышханла бир ненча жумушну тамамларгъа борчлу эдиле. Биринчиден - жыйылгъанлагъа кеслерини юслеринден къысха хапар айтып, танытдырыргъа. Экинчиден – аш-суу хазырлаудан тышында, хунерликлерин ачыкъларгъа. Ол жумушну аланы хар бири да тийишли толтургъандыла. Ызы бла уа конкурсну бардыргъан жырчы къызыбыз Гергъокъаланы Халимат къурашдыргъан сынамдан ётерге тюшгенди. Ол да не эди десегиз, биширилген жумуртхаланы терк эмда таза ариулай билиу. Анга сабийле бары да бек сюйюп къатышхандыла.
Конкурсну сюзген къауумгъа уа халкъ усталаны бирикдирген «Уста» деген организацияны таматасы Бачиланы Хамзат таматалыкъ этгенди.

Эришиуню ахыр кесеги уа миллетибизни эрттеден бери белгили болгъан ашарыкъларын кёргюзтюу эди. Аланы Къууанч, Динара, Милена, Лаура эм Назиля юйлеринден жарашдырып келгендиле. Сохтала, жёрмеле, хычинле, боза, айран, локъумла, нартюх гыржынланы тюрлюлери эм айырыу уча (къойну отну къызыуунда бишириу) - къарачай-малкъар халкъны сыйлы азыкълары бола келгендиле. Уллу къонакъланы ала бла сыйларгъа ата-бабаларыбыз ёч болгъандыла. Барыбыз да билгенден, бу азыкъланы хар бирини да бир ненча тюрлюсю белгилидиле. Конкурсчула да аны унутмай, жюрини аллына аланы бир ненчасын салгъандыла.

Сёз ючюн, нартюх гыржынны бизни аммаларыбыз бир ненча амал бла биширгендиле. Жолоучулукъгъа атланнган адамгъа аланы кюлде биширилгенлерин салгъандыла. Нек дегенде жауда биширилгенле терк бузулгъандыла. Айран бла нартюх гыржын кёплени жол азыкълары болгъандыла алгъын. Аны юсюнден бютюн толуракъ Бачиланы Хамзат хапарлагъанда, жыйылгъанла  анга сюйюп тынгылагъандыла.

Алай бла, битеу сынамладан да тири ётюп, конкурсну сюзгенледен да бийик белгиле алгъанла  Хаджиланы Назиля бла Оракъланы Къууанч болгъандыла. Назиляны учасыны жасалгъаны бла татымлылыгъы уа кёплени эслеринде къалгъанды.

Бу жолгъу эришиуню башхаладан энчилиги да болгъанды. Анга къатышхан хар сабийни элини таматасы ол кюн анда эди. Ала кеслерини жерлешлерин энчи саугъала бла белгилеп, кёллерин кётюргендиле.

Жюрини келечиси белгили альпинистибиз Ёлмезланы Абдулхалим да ол кюн хунерлерин кёргюзтген сабийлеге поэт Сергей Еремеевни малкъар таулагъа, миллетге жораланнган назму жыйымдыгъын саугъалагъанды.

Элбрус районну жер-жерли самоуправлениясыны советини таматасы Тохаланы Хыйса, быллай сейир жумушну миллет хазнабызны сакълауда магъанасы уллу болгъанын белгилеп, проектни автору Мокъаланы Гульнарагъа ыразылыгъын билдиргенди.

Къысха заманны ичинде уа конкурсну уллу байрамы ётерикди. Анга 2017 жылдан бери хорлай келген жашчыкъла бла къызчыкъла къатышырыкъдыла.