Саулукълары осал сабийлеге къырал себеплик этиледи

Саулукъларына кёре чекленнген онглары болгъаны, сакъат сабийлеге къаллай къырал себеплик этиледи? Аны  КъМР-ни прокуроруну тамата болушлукъчусу Сотталаны Жанна ангылатады.

 Аны айтханына кёре, «РФ-де сакъатланы социал къоруулауну юсюнден» федерал законнга тийишлиликде, сакъатлагъа болушлукъ жаны бла  система къуралгъанды.  Инсанланы бу къауумуна социал гарантияла тохташдырыладыла.

 - Ол санда ала саулукъларына кёре чекленнген онглары болгъан сабийлеге да бериледиле. Сёзге, къырал алагъа реабилитация мадарланы бардырыргъа, техника керекле бла жалчытыргъа борчлу болгъаны жазылыпды,-дейди ол. 

Социал организациялада жашагъан сакъат сабийлеге, ала ёксюз эселе неда къарар адамлары болмаса, 18 жыллары толгъанда  очередьсиз жашау журт бериледи. Алай бу кезиуде жаш адам кеси жумушларын тамамлаяллыгъы, башын кечиндираллыгъы эсге алынады.

Сакъат сабийлеге, аллай баланы ёсдюрген юйюрлеге жашау журт-коммунал жумушла ючюн къоранчларыны жартысы артха къайтарылады. Дагъыда  жашау журт ишлетирге, кеси мюлкюн бардырыргъа, терек бахча ёсдюрюрге жерни очередьсиз алыргъа эркинлик да тохташдырылгъанды.

«РФ-де билим бериуню юсюнден» федерал законнга кёре уа, саулугъу осал сабий школгъа дери билим бериу къырал учрежденияда тургъаны ючюн ата-анала ахча тёлемезге боллукъду. Энтта билим бериу организацияла сабийни юйде неда медицина учрежденияда окъутурча мадарла толтурургъа, аланы окъуу китапла, башха керекле, тилманч  бла да жалчытыргъа  борчлу этилгендиле.

Саулукълары осал студентлеге къырал социал стипендия да тёленеди, аланы бакалавриат эм специалитет программалагъа тийишлиликде окъургъа эркинликлери да тохташдырылгъандыла. Бу жумушлагъа ахча уа федерал, регион эм жер-жерли бюджетледен бёлюнеди. Бийик билим берген федерал къырал организацияланы хазырлау курсларына барыргъа да эркиндиле саулукълары осал жаш адамла.

- Льготала «РФ-де халкъны саулугъун сакълауну мурдоруну юсюнден» законда да бардыла. Анга тийишлиликде уа, сакъат сабийле битеу керекли дарманла эмда реабилитация керекле бла  врач жазгъан репецтге кёре хакъсыз жалчытылыныргъа керекдиле,-дейди Жанна Таукановна.  

«Къырал социал политиканы юсюнден» федерал законнга кёре, саулукълары осал сабийле санаторийлеге бла курортлагъа путёвкала бла хакъсыз жалчытылынадыла. Аланы багъыу учреждениягъа ашыргъан адамгъа  шахарланы араларында жюрюген автобуслагъа, темир жол транспортха билет хакъсыз  бериледи.