Студентлеге банкны ишинден ангылатхандыла

Кёп болмай  Сбербанкны бёлюмюню келечилери Къабарты-Малкъар къырал университетни студентлери бла тюбешип,  банкны ишини юсюнден билдиргендиле. Анга вузну тыш байламлыкъла жаны бла проректоруну къуллугъун толтургъан  Хусейн Кушхов, халкъла аралы бийик билим бериу школну таматасы  Аскер Вакашев,  Тюрк, Туркменистан, Афганистан, Египет, Индия, Иордания, Йемен, Сирия эм Абхазия къыралланы студентлери да  къатышхындыла. 

 Финанс-кредит организацияны келечилери  Людмила Культурбаева  бла  Мухамед Губачиков халкъла аралы тёлеу системала Россейде кеслерини ишлерине чекле салгъанларын билдиргендиле. Болсада  Сбербанкны  Visa эм  MasterCard карталарыны ишине къыралны ичинде  ол чырмау салмазлыгъын, ол санда иш хакъ тёленнгенлени да алгъынча хайырланыргъа жарарыгъын   айтып жапсаргъандыла.   Картадан  ахча тешерге,  номери бла ахча жиберирге,  Россейде оффлайн  эм интернет тюкенледе товарла ючюн тёлеуле этерге жарарыгъын да эсге салгъандыла.   

Россейде тёлеулени барысы да  миллет   тёлеу системаны (НСПК) хайыры бла этиледи. Алгъынча мартда  болжаллары  чыкъгъан  Россейде  этилген   карталаны орунуна башхаларын алыргъа боллукъду.   Аны бла бирге  Сбербанк  Мир/Unionpay дегенча  кобейдженг картаны да чыгъарлыкъды.   

Тыш къыраллы студентле  электрон амал бла  юйлеринден ата-аналары жиберген ахчаны алалмагъанлары бюгюнлюкде баш проблемадан бири  болгъанын айтып,  жашау этерге, окъууларына тёлерге да  онг  тапмагъанларын   жарсыгъандыла.

  - Ол тёлеуле бардыргъан банк чекле салгъаны ючюндю. Бизни жаныбыздан тыйгъыч жокъду,  ахчаны ким кёчюрсе да алырчабыз.  Жарсыуугъузну Сбербанкны таматаларына билдирирбиз,-  дегендиле банкны келечилери да.

Хусейн Кушхов а Къабарты-Малкъарда болум къоркъуусуз, тынч эм жарсымазча болгъанын айтханды.  Ол санда тыш къыраллы студентле  мындан арысында да къайгъырмай  окъууларын бардырыргъа боллукъларын къошханды. 

Студентлени жарсытхан соруула вузну  администрациясыны контролюндадыла, проблемала республикалы эм  федерал власть органланы келечилери бла   тамамланырыкъдыла.  Аскер  Вакашев а   РФ-ни Илму эм бийик билим бериу жаны бла министерствосу  Telegram-каналда «Друзья Минобра» блокда  Россейге окъургъан келгенлеге билдириу этилгенин эсге салгъанды.

Анда  Россейни илму эм бийик билим берген бёлюмю,  окъургъа эм байламлыкъда ишлерге   сюйгенлеге не заманда да  ачыкъ болгъаны айтылады. Аны бла бирге,   билим бериу, студентлени алышындырыу эм стажировка жаны бла программала да алгъынча  ишлегенлери   билдириледи. 

 

 

Магометланы Сулейман.
Поделиться: