Ата журтуна сюймеклик бла

Къулийланы Къайсынны мемориал Юйю–музейинде  Акъкъызланы Якубну бла Сияраны автолитографияларындан «Тауланы поэзиясы» деген кёрмючю ачылгъанды. Суратчыла бу ишлени Къайсынны поэзиясы бла ёхтемленип къурагъан эдиле. Графика серия художниклени атларын  искусство дуниясында бютюн белгили этгенди. Кёрмюч Якуб туугъанлы 80 жыл толгъанына эм малкъар халкъны Жангырыу кюнюне аталып ачылгъанды.

«Къайсын къаяланы, таулуланы, аны бла бирге битеу дунияны поэтиди. Якуб да къаяланы чексиз сюйгенди, атасы Алий бла анасы Кесам къол устала болгъандыла, - дейди музейни башчысы Къулийланы Фатима. – Якуб бла Сияра, Къайсынны поэзиясына суратладан сора да, «Нарт эпосну» унутулмазлыкъ сыфатларын къурагъандыла, китап графикалары ючюн Москвада, немисли шахар Баден – Баденде халкъла аралы китап кёрмючледе саугъала алгъандыла. Малкъар халкъны байрам кюнюнде биз искусствода бек бийик жетишимлери болгъанланы эсгерирге сюйгенбиз. Къайсын бла Якуб малкъар халкъны аллай сыйлы адамларыдыла».

Акъкъызланы Якуб къызы Имара бла жашы Ахматха хар ингирден Къайсынны назмуларын окъуп болгъанды. Имараны «Къайсынны окъуй» деген суратын бюгюнлюкде Къулий улуну Юйю–музейинде кёрюрге боллукъду.

Якуб таулуладан  СССР-ни суратчыларыны биригиуюне эм биринчи болуп киргенди. КъМКъУ-ну художестволу-декоратив искусствону факультетин Якуб бла бирге Габоланы Мусабий бошагъанды, ол а биринчи профессионал ювелир болгъанды. Мусабий кёрмючде студент жылларын эсгергенди, Якубну атасы битеу Тёбен Чегем сюйген жарыкъ кёллю, ариу тилли, чамчы, къол уста болгъанын айтханды. Кесам хазырлагъан кийиз а бюгюнлюкде да Сияраны мастерскоюнда сыйлы жерни алады.

Якуб альпинист эм тау туризм жаны бла инструктор эди. Ол тауланы, кесини беш бармагъынча, уста билгенди. «Атамы бла Къайсынны чыгъармачылыкъларында кеслерини халкъларына, туугъан жерлерине, тауларына сюймеклик сезиледи, - дегенди Акъкъызланы Имара. – Къайсынны  назмуларында да, атамы суратларында да музыка эшитиледи, ол туугъан жерлерине сюймекликни музыкасыды. Къайсын сёз бла жазгъанын атам бояула бла суратлагъанды. Бу эки адамны жанлары байламлы эдиле».

Кёрмючде, автолитографияладан сора да, Якубну Къайсын эм  сабийлери бла бирге, таулада тюшген суратларын кёрюрге боллукъду.