Гитче эм орталыкъ бизнесни кредит каникулла алыргъа онглары барды

2022 жылда гитче эм орталыкъ бизнесге кредит каникулла бериледиле. Аланы ахчаны къайтарыуну болжалын созаргъа неда тёлеулени азайтыргъа онглары барды. Быллай оноуну РФ-ни правительствосу бу кюнледе къабыл кёргенди. Бу жорукъла бла премьер-министр Михаил Мишустин къол салгъан бегимде белгиленнген тизмеге киргенле хайырланыргъа боллукъдула.

- Санкциялагъа къажау ишни планы барды. Аны тамамлагъандан сора да,  тюрлениулеге дайым да  келишдирирге керекди. Законланы проектлерини ючюнчю пакетин эмда праволу актланы жарашдырыргъа тийишлиди. Аладан бирлери хазырдыла. Сёзге, гитче эм орталыкъ бизнесде кредит каникулла алыргъа онглары болгъанланы тизмеси. Быйыл мартха дери займ алгъан предприятияла тёлеулени болжалларын  жыл жарымгъа дери созаргъа боллукъдула,-дегенди премьер-министр кенгешде.

Бу низам бла эл мюлк, илму, билим бериу, саулукъ сакълау, культура, къонакъбайлыкъ, спорт, халкъны аш-суу бла жалчытыу, информация технологияла (ол санда компьютерлени эм алагъа программаланы хазырлау), сатыу-алыу,   жумушланы тамамлау сферала киргендиле. Аладан сора да, каникулла бла дарманланы, аш-сууну жарашдыргъан, кийимле тикген, мебель  чыгъаргъан, пластикден бла чайырдан товарла хазырлагъан предприятияла да хайырланаллыкъдыла  – битеу да бирге экономиканы 70 тюрлюсю.

Бу тизме Россейге къажау санкцияла кийирилгенлери бла байламлы хазырланнганды.  Кредит каникулла 6 айгъа дери бериледиле. Аны бла  быйыл 30 сентябрьге дери хайырланыргъа боллукъду.