Бизнес бла кюреширге сюйгенлеге

«Иш кёллю Россей» жамауат организацияны Къабарты-Малкъарда бёлюмюнде къуралгъан Жаш тёлю бизнес-школ жангыдан эшиклерин ачханды. Быйыл ол кеси да очно-заочный халда ётерикди.

Школну баш борчу жаш адамланы бизнес бла кюреширге чакъырыуду. Аны кезиуюнде аланы предпринимательствону энчиликлери бла шагъырейлендирирге, бизнес планла жарашдырыргъа юйретирге эмда ызы бла ишлер жер табаргъа болушургъа умут этиледи. Быйылгъы курсла КъМР-ни Волонтёрствону айнытыу арасында ётерикдиле, деп билдиргендиле бёлюмде.

Бизнес-школну ишин башлау бла байламлы жыйылыуну бёлюмню башчысы Юлия Пархоменко ачханды. Ал сёзюнде бу проектни тарыхыны, жылдан-жылгъа ол къалай тюрлене баргъаныны, аны кезиуюнде кимле къаллай жетишимле болдургъанларыны эмда эсеплени юсюнден хапарлагъанды ол.

Быйылгъы курслагъа жаланда жаш тёлюню угъай, энди ишлеп башлагъан эмда сынамлы предпринимательлени да чакъыргъандыла. Аны хайырындан окъуучуланы саны иги да кёбейгенди. Дагъыда бизнес-школну программасына энчи социал проектни къошаргъа оноу этилгенди. Андагъы мастер-класслагъа ким сюйсе да къатышыргъа эркинди. Аланы жыл санларына кёре чек салынмайды. Юлия Пархоменко билдиргеннге кёре, проектни ары дери бардырылгъан кезиуюне жюз чакълы адам билим алгъанды.

КъМР-ни жарыкъландырыу, илму эм жаш тёлюню ишлери жаны бла министрини орунбасары Мокъаланы Ачемез проектге къатышыргъа сюйгенлеге салам берип, бизнес-школну ишине министерство да билеклик этгенин билдиргенди. Быллай окъутуу программаланы тауусханланы проектлери регионну экономикасына эмда инфраструктурасына танг къошумчулукъ этериклерине ышаннганын чертгенди. Министерство да кеси жанындан анга къатышхан хар ким бла да ачыкъ ушакъ бардырыргъа, бизнес-проектлерин тамамларгъа болушургъа хазырды, дегенди.

Монополиялагъа къажау федерал службаны (ФАС) республикада Управлениясыны башчысы Казбек Пшиншев бу школгъа эрттеден бери себеплик этеди. Аны чеклеринде жыл сайын мастер-классла бардырады, окъуучуланы проектлерин сюзген комиссияны ишине да къатышады. Ол таматалыкъ этген ведомство не заманда да бизнес эмда эркин конкуренция жанлы болгъанын белгилегенди, бизнес-школну ишине да бийик магъана бергенди.

Алгъышлау сёзлери бла: бизнесни айнытыу жаны бла эксперт Гузеланы Индира, «TRIZ араны» башчысы, бизнес-тренер Милана Махова, инстаграммда «Нальчик» бетни редактору Аслан Мазукабзов, бёлюмню башчысыны орунбасары Елена Давыдова да сёлешгендиле.

Ызы бла мастер-классла башланнгандыла. Гузеланы Индира «Энчи бренд къурау эмда аны айнытыу» деген тренингни кезиуюнде бизнесни эмда жамауат башламчылыкъланы айнытыуну юсюнден хапарлагъанды. Дагъыда шёндюгю дунияда социал сетьлени магъанасы  уллу болгъанын, товарланы сатыуда аланы къалай хайырланыргъа боллугъун да туура этгенди.

Быллай сетьледе ишлеуню юсюнден Аслан Мазукабзов да сёлешгенди. Милана Махова уа адам кесини жюреги тартхан ишни къалай табаргъа боллугъуну, предпринимательствода биринчи атламла этиуню, бизнес-проектлени айнытыуну юсюнден билдиргенди.

Бизнес-школ келир айны ахырына дери ишлерикди.