Нальчикни сыфаты ариу бола барады

Нальчик шахар округну жер-жерли администрациясында жер-жерли самоуправленияны Советини ахыргъы сессиясы бардырылгъанды. Былтыр не ишле этилгенини эмда быйылгъа къаллай борчла болгъаныны юсюнден доклады бла шахарны мэри Таймураз Ахохов сёлешгенди.

Билим бериу бёлюмню юсюнден айтханда, былтыр шахарда «Предгорный» районда 140 жерли сабий садик ишленнгенди. Школгъа дери билим бериу учреждениялада уа жети къошакъ объект ачылгъанды. Алагъа 340 сабий жюрюрге боллукъду.

Бу сферада жангы амаллагъа эмда технологиялагъа да эс бурмай болмайды. Ол умутда 26 номерли орта школну мурдорунда «Точка роста» деген ара ачылгъанды. Тёртюнчю номерли гимназияда уа «Кванториум» сабий технопарк ишлеп тебирегенди.

Мэр айтханыча, жыйырма орта школ озгъан жыл жангы компьютерле, оборудование, онлайн-конференцияла бардырырча техника бла да жалчытыннгандыла. Орта эмда школгъа дери билим берген учреждениялада 33185 сабийге жылы аш бериледи. Спорт эмда физкультура-саулукъландырыу жумушлагъа онеки мингден артыкъ сабий къатышханды.

Маданият бёлюмде этилген ишлени юсюнден да айтыр зат кёп болгъанды. Сёз ючюн, Ю. Х. Темирканов атлы биринчи номерли сабий музыка школгъа тынгылы ремонт этилгенди. Хасанияда Маданият юй эмда шахарны Къулий улу атлы орамда орналгъан китапханасы да жангыртылгъандыла. Дагъыда «Ата журтну къоруулагъанда жан бергенлени атлары эсде къалырча» программаны чеклеринде тёрт объектге тынгылы ремонт этилгенди.

Социал сфераны юсюнден сагъыннганда, Таймураз Ахохов льготалы къауумгъа кирген юйюрлеге 114 жер юлюш берилгенин билдиргенди. Жер-жерли администрацияда эсепде тургъан алтмыш юйюр да жашау болумларын игилендиргендиле.

Транспорт бёлюмде жангы реформа бардырылып тебирегенди. Анга кёре, адамланы транспорт жумушларын жалчытыу иш башха тюрлю къураллыкъды. Ол а неди десегиз, маршрутлада уллу автобусла хайырланыллыкъдыла.

Шахарны ичинде жангы, 33 номерли маршрут ачылгъанды. Ахчаны карточка неда къолдан къолгъа бермеген башха амал бла тёлегенде жолну багъасы отуз процентге учуз этилгенди. Анга кёре муниципал жамауат транспортда тийишли терминалла да орнатылгъандыла.

Барыбыз да кёргенибизча, арт кезиуледе жолланы жангыртыугъа бек уллу къыйын салынады. Шахарда да бу иш тынгылы барады: былтыр 29 орам тап халгъа келтирилгенди. Аланы бир-бирлеринде подряд организацияла жангы асфальт эмда бордюрла салырны аллында жер тюбюнде эски коммуникацияланы да алышадыла. Дагъыда тротуарланы жангыртадыла.

Жамауат тийрелени тапландырыу жаны бла да къадар иш этиле барады. Сагъынылгъан кезиуде аланы энтта да тёртюсю жангыртылгъанды. Ол санда: Москва атлы бульвар, Идаров эмда Хуранов атлы орамлада скверле, Къозу чегетчик.

Этилген ишле бла шагъырейлендиргенден сора шахарны мэри быйылгъа борчланы юсюнден да сагъыннганды. Алай бла 2022 жылда «Восточный» микрорайонда 1500 жерли орта школну къурулушу бардырыллыкъды, биринчи номерли гимназиягъа да тынгылы ремонт этилликди. Келир жыллада энтта да эки школ ишленирикди.

Республикада эм эрттегилиге саналгъан экинчи номерли сабий музыка школну жангыртыу сакълайды. Кенжеде Маданият юйге да ремонт этилликди. Шахарны эки китапханасыны мурдорунда жангы, шёндюгю излемлеге келишген китапханала къураллыкъдыла.

Маданият бёлюмде энтта да талай проектле эбине жетдирилликдиле. Ол санда жаш къараучуну театрына ремонт этилип бошаллыкъды. Ашуров атлы  орамда орналгъан, кеси да алгъын ишленип башлагъан Маданият айнытыу ара да быйыл битерикди.

Льготалы къауумлагъа быйыл да эс буруллукъду. Мэр билдиргеннге кёре, тийишли тизмеде болгъанлагъа энтта да эки жюз жер участка юлешинирикди. Элли кёп фатарлы юйге тынгылы ремонт этерге эмда 80 юйюрню жашау болумларын игилендирирге умут барды.

Транспорт сферада, жангычылыкъланы юсюнден айтханда, шахарда эм уллу сурам болгъан экинчи эмда алтынчы номерли маршрутла жангыдан ачыллыкъдыла. Жамауат транспортда уа «Тройка» картаны хайырланыргъа боллукъду.

Тапландырыу программала быйыл да бардырыллыкъдыла. Аланы чеклеринде жети сквер эмда жамауат тийреле жангыртыллыкъдыла. Шахарны администрациясы Нальчик сууну жагъасында къурулуш ишлени башлагъанды, дагъыда терренкурну жангыртыргъа умут барды.

 

 

 

 

Улбашланы Мурат хазырлагъанды.
Поделиться: