Ата журтубузну тарыхыны юсюнден терен билим алгъандыла

Нальчикни Совет Союзну Жигити Николай Калюжный  атлы 7-чи номерли школуну полициячы кадет классыны окъуучулары  «Хорламны поездинде» болгъандыла.

Быллай кёрмюч темир жолда жюрюген поездде дуния башында биринчи кере къуралгъанын айтырчады. Кеси да 9 бёлюмден къуралады. Алада озгъан ёмюрню 40-чы жылларында къыралда жашау суратланады. Анда къараучула мамыр жашауну, урушну ачылыгъын да кёрюрге боллукъдула. 2022 жылда уа кёрмючге жангы экспозиция къошулгъанды – Брест къалагъа чабыуул эмда аны жигит къоруулаучуларына аталгъан.

Битеу да бирге уа «Хорламны поездинде» 13 тема ачыкъланады. Кадетлени Совет союзну  озгъан ёмюрде жашауун кёрюрге, туугъан журтубузну тарыхында эм къыйын кезиуню юсюнден шартланы билирге онглары болгъанды. Музейни къурагъанланы болушлукълары бла  жаш адамла  Уллу Ата журт урушну кезиуюнде бардырылгъан хауа сермешлени, танкланы атышыуларын, аскерчилени къазауатны кезиуюнде жашауларын кёргендиле. Бу шартла уа жашланы кёллерине жетгенди:

- Биз кёп сейир, ахшы затланы кёргенбиз, урушну юсюнден терен билим алгъанбыз. Кёрмючню къурагъанла сау болсунла, - дегендиле кадетле.