Жаяу жюрюген адамлагъа сакъ болургъа чакъыргъандыла

Къырал автоинспекторла  жамауатны келечилери бла бирге Черек районда турист-рекреация жерледе солугъанланы жолда  жорукъланы сакъларгъа кереклисин эсгертгендиле.

«Жаяу адам. Жаяу ётерге жарагъан жер» акцияны чеклеринде полициячыла водительлени, жаяу адамланы да бир бирге хурмет этерге чакъыргъандыла. Хауа жылыннганы бла жоллада жаяу адамланы саны кёбейгенди, туристле республиканы айбат жерлеринде жаяу жюрюрге сюедиле. Аны себепли водительле бютюнда сакъ болургъа керекдиле. Ол санда  жолдан жаяу ётерге эркин жерлеге жууукълашханда тынчыракъ барыргъа, адамлагъа жол берирге тийишлиди.

Автоинспекторла ата-аналаны машинада сабийни къоркъуусузлугъуна жууаплы кёзден къарарларын да тилегендиле. Кече уа ала жолда кёрюнюрча кийимлерине светоотражательле тагъаргъа боллукъларын ангылатхандыла. 

 Ахырында водительлеге жолда жюрюуню жорукълары бла китапчыкъла юлешиннгендиле. Акциягъа Черек районну ич ишле органларыны ветеранларыны советини башчысы Жаболаны Жабраил да къатышханды.