Жетишимли спортчуланы - адамлыкъны багъалап жаш адамланы ёсдюредиле

Орёл шахарда всестилевой каратеден 12-18-жыллыкъ спортчуланы араларында Россейни биринчилиги бардырылгъанды, анда хорлагъанлагъа дунияны биринчилигинде сермеширге онг берилгенди. Анга къыралны 52 регионундан 1500-ден аслам адам къатышхандыла. Къабарты-Малкъарны командасы каратени эки бёлюмюнде – толу контакт эм къорууланыу амалла бла толу контакт – эришгенди.

Эришиуге келген спортчула кючлю болгъанлары, ала дуния даражагъа чыгъаргъа итиннгенлерини хайырындан сермешле сейир, ариу приёмлагъа бай болгъандыла. Алай эсе да, бизни каратечилерибиз 9 майдал къытаргъа жетишгендиле. Алтын майдалланы Аппаланы Астемир, Роман Капранов, Владимир Павлов къытхандыла. «Кюмюшлени» Эльдар Бабугоев, Асанланы Алибек, Къараланы Марат алгъандыла. Алтууланы Алан, Максим Сергеев, Беслан Хутов ючюнчюле болгъандыла. Аланы тренерле Мурат Сабанчиев, Шахмурзаланы Шахмурза, Казбек Майрамуков, Зураб Джинчерадзе, Даут Кешев, Рустам Гудов, Руслан Шогенов, Алан Макоев юйретедиле.

Биринчиликден сора каратечиле эм аланы тренерлери бла Къабарты-Малкъарны Спорт министерствосунда тюбешиу болгъанды, аны министрни орунбасары Аналаны Аслан бардыргъанды, ол спортчуланы жетишимлерине, аланы хазырлагъан тренерлени усталыкъларына да бийик багъа бичгенди эм мындан арысында да хорламлы болурларын тежегенди.

Мурат Сабанчиев билдиргеннге кёре, дунияны чемпионаты Москвада 22-25 ноябрьде боллукъду. Анга биринчи эм экинчи жерлени алгъанла чурумсуз къатышырыкъдыла, ючюнчю жерлеге чыкъгъанлагъа уа анга тюшер ючюн, кеслерин башха эришиуледе кёргюзтюрге онг берилликди. Хар бир ауурлукъ къауумда къыралдан тёртюшер спортчу боллукъду.

Казбек Майрамуков ангылатханыча, къорууланыу амалла бла толу контакт бёлюмде спортчула башларына шлем, къол къапла киедиле, ол къол тюйюшге, дзюдогъа да ушайды, тутушуудан да приёмла бардыла.  Каратени кёп стильлери болгъаны кесини ызын къояды, бир спортчу кесин аланы талайында кесин сынаргъа да боллукъду. Аны контактсыз тюрлюсюнде спортчула бир бирлерине артыкъ къатылмайдыла. Кёкушинкайдан эм аны бёлюмлеринден контактлы карате къуралады. Ючюнчюсю да, айтханыбызча, къорууланыу амалланы хайырланып сермешиудю. Бизни республикада ала барысы да иги айныпдыла. Аланы барысындан да эришиуле бардырыргъа уа жарамазмы деген соруугъа жууап бере, Мурат Сабанчиев юлгюге женгил атлетиканы келтиргенди: «Атлетикадан эришиулеге уллу залла бериледиле, алада спортчулагъа кюрешген дисциплинарда эриширча жерле белгиленедиле. Каратеде да ол сынамны хайырланыргъа боллукъ эди».

Биринчиликни юсюнден оюмларын спортчула да билдиргендиле. «Алтынны» къытхан Роман Капранов каратени кёкушинкай тюрлюсю бла кюрешеди. Ол эришиулеге къыстау хазырланнганын, ала бийик даражада къуралгъанларын айтханды. «Мен тёрт тюбешиу бардыргъанма. Эм къыйын биринчиси кёрюннгенди, артда эс жыйгъанма. Экинчисинде къаршчы спортчум бек къарыулу эди, аны бла сермешим эм узун болгъанды – ол алты минутха дери созулгъанды. Финалда уа мени бла эришгенден тёрт килограммгъа женгил эдим, ол къытаргъа болушханды», - дегенди. Беслан Хутов а финал ючюн тюбешиуде бегирек къыйналгъанын, къаршчы спортчу иги да уллу кёрюннгенин билдиргенди.

Алгъаракълада каратеде бек магъаналы сорууладан бири ол Олимпиадагъа кирлиги бла къаллыгъы эди. Бу ишде чырмаула да чыгъа тургъандыла. Болсада, тренерле 2020 жылда Олимпиада оюнлада каратени чекленнген контактлы тюрлюлеринден сермешле да боллукъларын билдиргендиле. Бу оюнлагъа тюшмеселе да, экинчилеге къатышыргъа бизни спортчуларыбызны онглары болуруна ийнанырчады. Нек дегенде бизни республикада каратаден школ иги айныгъанды. Башха регионладан артха къалмайбыз, каратечилебириз баргъан жерлеринде майдалсыз къалмайдыла, араларында дунияны, даражалы халкъла аралы турнирлени чемпионлары кёпдюле, жангы тёлюлери да умутландырады. Жангыз да, Мурат Сабанчиев эс бурдуртханыча, сабийлени юйден, компьютерледен, телефонладан айырыргъа, спорт заллагъа келтирирге керекди. Тренерле уа аладан жетишимли спортчула ёсерлерине, андан да бек а ала адамлыкъны багъалагъан, ариу ниетлени тутхан жашла бла къызла болурларына къайгъыра ишлерикдиле.