Бир затда жетишдим да, ол болады деп, жерингде туруп къалыргъа жарамайды

 Ахматланы Борисни бла Алботланы Ханифаны къызлары Заира юлгюлю жаш тёлюбюзню келечисиди. Ол ишлеген жерлеринде адамла бла бир тил таба билгенди, сынам жыйгъанды, бюгюнлюкде уа кесини производствосун да ачып, хайырланыучуладан ыразылыкъ тапханды. Ол ишини энчиликлерини, къаллай жетишимле болдургъаныны юсюнден а бизге билдиргенди.

 Сабийлиги Заираны Жанхотия элде ётгенди, юйюрлери уллуду, юч эгечи бардыла. Абаданыракъ болгъанында ала Тырныауузгъа кёчгендиле. Анда 1-чи номерли лицейни тауусханды, битеу бешле болмагъан эселе да, аман окъумагъанды. Бийик билим алыргъа заман жетгенде, атасы бла анасы  тилни иги билгени себепли Филология факультетге киририн сакълай эдиле. Малкъар тилден олимпиадада алчы жерни алгъаны себепли, ары экзаменсиз кирирге окъуна онгу бар эди. Алай ол Инженер - техника факультетни «Управление качеством» деген бёлюмюн сайлагъанды. Экзаменлени ахшы берип, анда окъуп башлагъаны бла юйдегилерин да бек сейирсиндиргенди. 

  Алай ИТФ-ни сайлагъанына къыз бир да сокъуранмагъанды, аны къызыл дипломгъа бошагъанды, сора магистратурагъа киргенди. Окъуу жыллары къыйын болгъан эселе да, бек сейир эдиле, кёп затха юйреннгенди, артда жашауунда анда алгъан билими да жарагъанды. Неден да бек аудитни жаратханды. Устазы Римма Волкова юлгю эди, андача къаты, билимли болургъа итиннгенди. Бир уллу компанияда тинтиуле бардырыргъа мурат да этгенди. «Магистратурада окъугъан кезиуюмде бош заманым аслам болуп, ишге кирирге онгум бар эди. Аны хайырланып почтада урунуп башлагъанма. Алай анда жангыз да жети айны тургъанма – документле бла ишлерге, адамла бла байламлыкъла тутаргъа юйреннгенме, ол да аламат сынам эди. Алай бу иш манга келишмегенин ангылап, кетгенме», - деп эсгереди ол.

Магистр дипломну алгъандан сора, бир кесек солур муратда эгечи бла Москвагъа, Санкт-Петербургга баргъандыла. Андан къайтханлай а, жангы иш излеп тебирегенди. Газетде билдириуледе Высоковольтный аппаратураны хазырлагъан заводда качество жаны бла инженер изленнгенин кёрюп, ары атланнганды. Анда сёлешиулени ётгенди, ала тынч болмагъанларын да белгилерге тийишлиди. Алгъа билимине заводну генеральный директору Махийланы Руслан (жаннетли болсун) къарайды. Ызы бла уа заводну директору Махийланы Абдулла бла сёлешеди. Ол кёп соруула бергенди, ахырында Заираны кандидатурасын къабыл кёреди эм, башха адамладан болушлукъ сакъламай, кеси ишлерге керек болгъанын чертгенди. Бу сёзлери бир кесек сагъайтсала да, жигит къызны къоркъутмагъандыла: «Коллективибиз бек иги эди. Бу заводха тюшгениме бек ыразыма – анда усталыгъымы ёсдюргенме, сынам жыйгъанма, тенгле да тапханма. Анда эки жылны уруннганма, бусагъатда къарындашым бла ишлейме эм кесими продукциямы чыгъарама».

Ара шахарлада жаш адамлагъа онгла, айхай да, кёбюрекдиле. Алада жууукълары болгъанлыкъгъа, кеслерине чакъыргъанлай тургъанлыкъгъа, иш да табылгъанлыкъгъа Заира туугъан республикасындан тышына кетерге сюймегенди. Мында атасы бла анасы, тенглери, туугъан жери – аладан айырылырыгъы келмегенди.

Кеси чыгъаргъан продукцияны юсюнден айтханда уа, Заира шампуньла бла эм чачха керекли башха затланы чыгъарады. Ол бек алгъа, бу иши аны бек къууандыргъанын белгилейди. «Мен шампуньла, чач тюшмезча спрейле, маскала жарашдырама. Эртте кесиме, эгечлериме маскала этип кёрген эдим, болушханын эслейме, алай ол заманда производство ачаргъа акъылым жокъ эди. Инстаграммгъа къарай кетгенде, адамла кеслери этген затланы сатханларын кёрюп, кесим да башларгъа умут этеме. Трихологла, химикле, биологла эм башхала специалистле бла тюбейме, сора ала бла бирге ишлеп тебирейбиз. Бек биринчи чач тюшюуден сакълагъан, чачны жангыдан ёсдюрген «ZAIRAZARA» спрей чыгъаргъан эдим, анга кирген битеу ингредиентлени атларын айталлыкъ тюйюлме, ол коммерциялы жашырынлыкъды дейик. Аны букъдуруп этмейме, алай бирле эшитгенлей, меникине ушагъан жалгъан продукция этип тебирерикдиле, аллайланы качестволары уа иги болмаучуду. Аны адамла сынап кёредиле, эм болушханын билдиредиле. Аны алгъан къызла, ыразылыкъларын билдире, чачлары къалын болгъанын, аз тюшгенин дайым жазадыла. Ол да кёлюмю кётюреди. Ызы бла шампунь бла маскала чыгъарып башлайбыз, бусагъатда пилинг да хазырлап тебирегенбиз. Кёп болмай а, Эмиратладан уллу партия алыргъа заказ келгенди», - дейди Заира ушагъыбызда.

Заира оюм этгенден, тиширыу кесине къараргъа, ариу болургъа керекди. Аны чач жууучуларында сульфатла, парабенле, къалын этиучю эм башха заранлы веществола жокъдула. Файдадан да бек хайырланыучуланы ыразылыкълары багъалыды. Жарашдыргъан затлары адамлагъа жарагъанлары аны бек къууандырады. «Былайда бир затны эсгертирге сюе эдим: адамны чачлары тюшмей эселе, ол жарсымайды. Алай профилактика этерге керекди, экологиябыз, аш-азыгъыбыз сейирлик иги тюйюлдю. Ол проблема кимге да келирге боллукъду.  Жашауубуз тынч тюйюлдю, тиширыуларыбызны кеслерине къараргъа заманлары да табыла болмаз. Таулу тиширыула юйюрлерине бек сакъдыла, аны ючюн алагъа хурмет-ыспас этеме. Алай мен аланы кеслерин бегирек сюерге, багъаларгъа чакъырлыкъ эдим. Атам: «Кесинги башхаладан эниш этме, алай бийикге да салма», - деп юйрете эди да, мени айтырыгъым да алайды», -дейди.