Коррупциягъа – биргелей къажау турургъа

Къабарты-Малкъар къырал аграр университетде КъМР-ни Башчысыны Администрациясыны башламчылыгъы бла «Коррупцияны профессионалла хорлайдыла» деген  форум бардырылгъанды .  Анга КъМР-ни  Экономика эмда жамауат къоркъуусузлукъ жаны бла советини  секретары  Казбек Татуев, федерал инспектор Тимур Макоев,  КъМР-ни Башчысыны Администрациясыны коррупциягъа къажау управлениясыны таматасы Аслан Нагоев,КъМКъАУ-ну ректору Аслан Апажев,   талай  министерствону бла ведомствону келечилери къатышхандыла.
        Кесини алгъышлау сёзюнде Казбек Татуев  коррупциягъа къажау сюелиу келир тёлюле ючюн къайгъырыуду, жамауатны къолайын кётюрюудю,деп чертгенди. Биз бу кюрешни право институтлагъа таяна, экономикада бола тургъан бузукълукъланы  ачыкълай,  тыш къыраллы сынауланы да тинте, жууаплылыкъны да кётюре алай бардырыргъа керекбиз,дегенди.
         Аслан Апажев а быллай жыйылыула къыйматлы амалланы кёрюрге, билирге,  жангыларын табаргъа  себеплик этгенлерин белгилегенди.  Тимур Макоев  акъыл этгенден а, бу ишде  тынгылы хазырланнган кадрла керек болгъанларын, коррупциягъа къажау кюрешге жаш адамланы бютюн тири къатышдырыу да хайырлы болмай къалмазлыгъын эсгертгенди.
     Андан сора  Аслан Нагоев КъМР-ни Башчысыны Администрациясы коррупциягъа къажау къаллай ишле тамамлагъаныны юсюнден билдиргенди. 2018 жылда бюджет ахча белгиленнген ишледен башха затлагъа къоратылгъаны бла байламлы талай  тинтиу бардырылгъанды, аланы эсеплерине кёре, эки къуллукъчугъа, ала  министрни орунбасарлары эдиле, дау  этилгенди. РФ-ни законодательствосу   къалай толтурулгъанына контроль этиуню чеклеринде къырал сатыу-алыу  жаны бла алты эмда пландан тышында да  юч тинтиу бардырылгъандыла. Аланы кезиуюнде  150 бузукълукъ ачыкъланнганды, тазирле салыннгандыла.  Отчёт кезиуню ичинде  къырал власть  эмда  жер-жерли самоуправление органланы сайтларында норматив-право актланы 800-ден аслам проекти басмаланнгандыла.    
 Ызы бла Контроль-Эсеплеучю палатаны аудитору Мухамед Пежев ведомство  тамамлагъан ишле бла шагъырей этгенди.  Жарсыугъа, къуллукълары болгъанланы уллу кёллюлюклерини  хатасындан башха сылтаула бла да  иш хакъгъа деп бёлюннген ахча башха ишлеге   тёленнген кезиуле кёп тюбейдиле, дегенди ол.Организациялада   коррупциягъа къажау  ишле халкъла аралы стандартлагъа  къалай келишгенлерини юсюнден а  КъМР-ни Сатыу-алыу-промышленный палатасыны председатели Хасан Гукетлов билдиргенди.
      Бу магъаналы теманы сюзюу секциялада да къуралгъанды. Алагъа къатышханла   норматив-право актланы, прокурор надзорну, кадрла хазырлауну,  къырал эмда муниципал жумушланы  тамамлауну,   жамауат  контрольну эмда кёп башха затланы юслеринден оюмларын айтхандыла.
     Форумну къурагъанла оюм этгенден, ол  Къабарты-Малкъардача, саулай Шимал-Кавказ  федерал округда да коррупциягъа къажау жарыкъландырыу ишге себеплик этерге керекди.