Нартюхню урлугъуна тышында да сурам уллуду

Бюгюнлюкде Къабарты-Малкъар Россейни регионларын нартюхню урлугъу бла жалчытханладан бириди. Жыл сайын республикада бу битимни гибрид тюрлюлеринден - ФАО-150-ден башлап ФАО-600-ге дери - 15 минг тонна урлукъ жарашдырылады. Аны бла бирге мирзеуге эм силосха жарарчасы да ёсдюрюледи.  

Урлукъланы тышына ашырырдан алгъа, Россейни Россельхознадзоруну республикада управлениясыны ишчилери продукцияны карантин-фитосанитар болуму, качествосуна бла сортлары кёргюзтюлген сертификатла болурларына контроль этедиле.  

Россельхознадзордан билдиргенлерине кёре, Къабарты-Малкъарда нартюхню урлугъу Самара, Нижегород, Ульяновск, Пенза, Томск, Омск, Смоленск, Рязан, Свердловск, Иркутск областьлагъа, Татарстан, Башкортостан, Удмуртия, Мордовия республикалагъа эм Алтай бла Красноярск крайлагъа сатылады. Аны бла бирге тыш къыралланы рынокларында да сурам ёсе барды. Ол санда былтыр Беларусь, Казахстан, Узбекистан, Таджикистан республикалагъа экспорт этилгенди.