Ахшы муратлары алдадыла

2020-2021 окъуу жылда  школчуланы бардырылгъан ана тилледен регион даражалы олимпиадаларында малкъар тилден тёрт къызчыкъ айырмалы болгъандыла. Аланы араларында Барасбийланы Милана да барды.

Эсгерте кетейик, ол сагъынылгъан олимпиадагъа онбиринчи классны таууса тургъан кезиуюнде къатышханды. Анда биринчи жерни алып, республиканы Башчысыны ахча саугъасына тийишли болгъанды. Дипломун а жууукъ заманда къууанчлы халда аллыкъды. Аллай тюбешиуле, белгилисича, пандемия болум къыйын болгъаны ючюн къуралмай тургъандыла.

Милана Жанхотияда туугъанды. Быйыл, элни Малкъарланы Хамзат атлы битеулю билим берген орта мектебин алтын майдалгъа тауусуп, Къабарты-Малкъар къырал университетни медицина факультетини фармация бёлюмюне окъуугъа киргенди. Бу ызны сайларыгъын ол гитчелигинден да билип, тогъузунчу классны бошагъанында биологиядан бла химиядан бергенди ОГЭ-лени.
Артда  Бир къырал экзаменнге кеси да Интернетни хайыры бла хазырлана, ызы бла уа репетиторлагъа жюрюгенди. Усталыкъ ышанлары бла айырмалы устазланы юйретгенлери да бошуна кетмей, ЕГЭ-леде бийик балла алып (сёз ючюн, орус тилден-90), ол сагъынылгъан факультетни бюджет бёлюмюне тюшгенди.

Аны ючюн а аслам затха тюшюндюрген педагогла Елена Борисовна Щербаньнга (химия), Марина Мухамедовна Хажумаровагъа (биология), бирсилеге да ыразылыгъын билдиреди. Алыкъа биринчи курсда эсе да, окъууун тауусуп, аптека ачып, жамауатны качестволу дарманла бла жалчытыр муратлыды. Адамла аланы жер-жерледе излеп айланмазча болургъа кереклисине ийнанады.

Школда окъугъан заманыны эмда анда устазларыны юслеринден айта, Милана малкъар тилден бла адабиятдан дерслерине бютюн сюйюп жюрюгенин белгилейди. Аладан окъутхан Жаппуланы Зухура Абдуловнаны ишине кёлю бла берилгенин, сабийлени сейирлерин къозгъай эмда ёз тилибизге сюймекликни кючлей билгенин чертеди. Аны алайлыгъын а ол юйретген окъуучуланы болдургъан жетишимлери ачыкълайдыла.

Юлгюге Барасбийланы къызларын алсакъ, ол хар заманда да къатышып тургъанды малкъар тилден бардырылгъан олимпиадалагъа, бирси жумушлагъа да. Алай бла ол тогъузунчу классда район даражалы урумда (олимпиада) алчы орунну алгъанды. Онунчу эмда онбиринчи класслада уа, райондагъы бёлюмледен сора да, регион кесеклеринде биринчи жерлеге тийишли болгъанды.

Милана Зухра Абдуловнаны, малкъар тилни да энчи кёргенин айта, устазы аны быллай олимпиадалагъа  къатышдыра тургъаны  ючюн анга ыспас этеди. Аланы жаш тёлюге магъанасын, себеплигин черте, кеси ийменчек сабий болгъанын, аллай тюбешиуле эмда жетишимлери анга жамауат ичинде кесин жюрютюрге, билимине ышаныргъа юйретгенлерин, кёз къарамын кенгертгенлерин билдиргенди эмда окъуучуланы аллай жумушлагъа эрикмей къатышып турургъа чакъырады.

Дерслери кёп заманын ала  эселе да, ол дагъыда билимин медицина литератураны окъуй, кеси аллына да ёсдюреди. Анасы бла бирге эшиу эшерге да сюеди. Алай эсе да, аны эм жаратхан заты аш хазырлауду. Бюгюнлюкде Интернетде не тюрлю рецептни да табаргъа, аны хайырланыргъа боллугъу белгилиди. Милана алагъа тюшюнюрге угъай демесе да, таулу хычинлени уа бир затха да алышмайды. Нек дегенде ол миллет ышанларыбыз жаланда аш-суу бла байламлы угъай,  андан тышында жашауубузну, турмушубузну бирси бёлюмлеринде да энчиленнгенлей, сакъланнганлай турурларын излейди.