Къабарты орам кенгертилликди, жангы бет аллыкъды

Нальчикде Къабарты бла   Идаров орамла бирге къошулгъан жер транспортну кёплюгю ючюн уллу ауурлукъ жетген участокга саналады. Былайдан бир суткагъа 34 минг машина ётеди. Ол санда   Май бла Прохладна районлагъа да кёпле былайтын барадыла. Аны себепдли бу кюнледе подряд организацияны ишчилери Къабарты орамны 4,6 километр  чакълы бирине тынгылы ремонт этип башлагъандыла. жангыртыу ишлени кезиуюнде машиналагъа тыйгъыч чыкъмазча мадар да этилгенди.

Проектге кёре эски светофорланы, белгилени, къоркъуусузлукъну жалчытхан бурууланы, бордюрланы кетерликдиле, газ ызланы, къараучу къуюланы, жер тюбю бла ётген жаяу жолну да тап халгъа  келтирликдиле. Саулай алып айтханда,  жол жангы мардалагъа келиширикди.

Ишлени биринчи кесегинде аны мурдорун кючлерикдиле, арыкъларын, тротуарланы жангыртырыкъдыла. Ол бусагъатдан кенг боллукъду, бир-бир жерледе къошакъ ызла да тартыллыкъдыла. Ахырында  жолгъа эм тротуарлагъа да асфальт  жайыллыкъды. Ремонт этилип бошалса, жашилендириу ишле да тамамланырыкъдыла.

Бюгюнлюкде подряд организация  жолну кенгертир ючюн, эски бардюрланы кетере турады. Ишле саулай келир жыл августха тамамланылыргъа керекдиле.

Магометланы Сулейман.
Поделиться: