Жангы физкультура-саулукъландырыу комплексни ачылыууна къатышханды, жаш инсанлагъа паспортла бергенди

КъМР-ни Башчысы Казбек Коков Бахсан шахар округда жашагъан жашланы бла къызланы къауумуна Россей Федерацияны паспортларын къууанлы халда бергенди. Аланы Россей Федерацияны Конституциясыны кюню бла алгъышлай, уллу жетишимле тежегенди.

-Деменгили къыралыбызны инсаны болуу – ол уллу сыйды, аны бла бирге уа уллу жууаплылыкъды. Россей Федерацияны  Конституциясы бизге айный барыргъа, келир заманнга таукел къараргъа онг береди. Ма аны хайырындан алгъанды республикабыз къыраллыкъны, олду бизге, Россейни башха субъектлерине да кюч-къарыу берген. Анда адет-тёрелерибизни сакъларгъа, ана тиллерибизни билирге борчлу болгъаныбыз жазылыпды. Ма бу документ бизге Россейли къыралны деменгили жеринде бир юйюрча жашаргъа онг береди, - дегенди Казбек Коков, жаш адамлагъа насийхат сёзюн айта.

КъМР-ни Башчысы битеу дунияны къыйнагъан пандемия салгъан тыйгъычлагъа, экономика къытлыкъгъа да къарамай, Россей кючлю къырал болгъанлай къалады, миллет проектлерин, уллу федерал эмда регион программаларын жашауда бардырады, деп чертгенди.

Байрам кюн Бахсан шахарда «Олимп» физкультура-саулукъландырыу комплекс да ачылгъанды. Ол «Демография» миллет проектни «Спорт – жашау мардады» федерал проектине кёре ишленнгенди.  Анда жарауладан сора да, эркин тутушуудан тюрлю-тюрлю эришиуле бардырыргъа боллукъду. Бери кюн сайын жюз адамгъа спорт бла кюреширге тап онгла къуралгъандыла.

Жангы спорткомплексде тренерле Бахсан шахарны Олимпиадалы резервли спорт школуну эркин тутушуудан секциясына жюрюгенле бла биринчи жарауларын бардыргъандыла.

2022 жылда миллет проектледе белгиленнген ишле муниципалитетде андан ары бардырыллыкъдыла. Казбек Коков келир жыл Бахсанда шёндюгю заманнга келишген уллу школ ишлениригини юсюнден билдиргенди. Ол 2023 жылда хайырланыргъа берилликди. Быйыл а  шахарда ара район больницаны экинчи поликлиника бёлюмюн жангыртыу ахырына жетдирилликди. 2022 жылда эки школгъа тынгылы ремонт этерге, жолланы тапландырыргъа белгиленеди. Бек магъаналыгъа уа Бахсанны тёгерек айланнган суу ызыны къурулушу саналады. Аны 2023 жылда бошаргъа план барды.

Поделиться: