Студентле сынамларын ёсдюрюрча

Кёп болмай Къабарты-Малкъар къырал университетни студентлери  практикаларын «РЖД-Здоровье» ачыкъ акционер биригиуню бёлюмюнде «Долина нарзанов» санаторийде ётерча  келишим этилгенди.  Ол КъМКъУ-ну социал-гуманитар институтуну  туризмде менеджмент эм экономика   кафедрасыны башламчылыгъы бла  бардырылады. 

«Туризм»,  «Къонакъ юй бла байламлы иш»  эм практика бардырыу программалагъа башчылыкъ этген  доцент Байсултанланы Лейля,  кафедраны таматасы Аксана Карашева эм Теммоланы Зарият, «Долина нарзанов»  санаторийни таматасы Чапаланы Ибрагим бла тюбешип, тийишли сорууланы сюзгендиле.

Эсге сала айтсакъ, жыл сайын КъМКъУ-ну туризм  бёлюмюн очно халда 60-70 чакълы адам бошайды. Ала туризм эм санатор-курортла жаны бла  жетишимли урунурукъ  специалистледиле.

«Долина нарзанов»  паркы бла бирге  саулай 3,5 гектар жерде  орналады. Комплексге эки беш этажлы  юй эм эки этажлы бир корпус киреди. Аланы биринде номерле эм башхасында  саулукъгъа  багъыу жумушла тамамланадыла.  Эки къатлы мекямда уа  ашхана эм  солугъанла   заманларын зауукълу ётдюрюрча онгла къуралгъандыла.

Учрежленияда бир жолгъа 160 адам жашаргъа  боллукъду. Санаторийни минерал сууу бла  жайда, къышда да ишлеген  уллу бассейни барды. Ол жюзгенлеге тап болурча не заманда да 36 градус жылылыкъда сакъланады.    Аны бла бирге Тамбукан кёлню  балчыгъы эм минералё ичер суу да хайырланады.  Мында аш орунлары, чегилери, нерва, эндокрин системалары, къан тамырлары бла жюреклери, сюеклери, шаугютлери, тиширыу органлары эм башха затлары къыйнагъанла багъыладыла.  

КъМКъУ-ну практика ётерге  эм урунургъа болушхан управлениясыны хайырындан бюгюнлюкде  санаторийден  бир къауум студент къармашады.  Аладан бири  «Къонакъ юй бла байламлы иш» бёлюмню   магистранты Ахматланы Зулфияды. Ол кеси  айтханнга кёре, мында ишлеп башлардан алгъа бир айны  стажировканы ётгенди. Администратор усталыгъын  бек жаратып турады. Аны борчуна  къонакълагъа тюбеу, документлерин жарашдырыу, номерле  бла жалчытыу эм башха жумушла да  киредиле. Ол къонакъ юйледе бла  санаторийледе  администратор болурдан алгъа башха кадрланы ишлери бла да шагъырей болургъа керегин белгилейди.    Зульфия бла бир курсда окъугъан   Фатима Гендугова да  мында администраторду.

Фатима да  бийик квалификациялы специалистле уруннган,   сервислери  эм саулукъгъа багъыу процедуралары жангы стандартлагъа келишген санаторийде кесини жерин тапханына бек къууанады.  Белгилисича, курорт, санаторий болсада,  жаланда тийишли инфраструктура бла чекленип къалмайды. Кадрла да бет жарыкълы бола билирге керекдиле. Аны ючюн мында да  хар адамгъа энчи кёзден къараргъа, ыразы этерге кюрешедиле.

- Солугъанланы хар бири да, бизни сервисибизни жаратып, ыразы болуп  кетедиле. Алай эсе уа, ала экинчи жылда да бизге къайтырыкъларына уллу ышаныулукъ барды,- дейди Фатима.