Эсге тюшюргендиле, бушуу этгендиле

Огъары Малкъарда эрттегили Сауту элде  Черек районда  79-жыл мындан алгъа болгъан бушуулу ишле бла байламлы  митинг болгъанды.

Андан бери кёп жылла озгъандыла, болсада адамла унутмагъандыла ол бушуулу къара кюнлени. Жукълап тургъан абаданланы, сабийлени, тиширыуланы НКВД-ны аскерчилери келип, ёлтюрюп кетгендиле, аланы араларында Глашлары, Огъары Чегет,   ол санда Саутуну да кюйдюргендиле. Ол затланы кёрген, сынагъан адамла бюгюнлюкде алай кёп жокъ эселе да, бардыла. Жаланда бир кечеге, ноябрь айны 28-29 дери НКВД-ны отрядлары жюзле бла   саналгъан  таулуланы ёлтюргендиле. Андан сора уа, ызларын жокъ этер ючюн,  эллени да кюйдюргендиле.

Алай бла ала «бандитлени» жокъ этгендиле: хаталары, къыйынлары  тиймей тургъан тиширыуланы, сабийлени, къартланы… Аланы жашлары, баш иелери уа ол кезиуде Уллу Ата журт урушда  Ата журтну  немисли фашистледен къоруулай жанларын бере эдиле. Ол урушха уа Огъары Малкъардан минг бла жарымгъа жууукъ жаш кетген эдиле.  Кёп къалмай, хар юйюр да урушха кесини 2-3 адамын ашыргъанды.

Ол кюн алайгъа, ёлгенлени хурметлерге  район администрацияны башчысыны орунбасарлары Глашевланы Артур эмда Улбашланы Сахадин, КъМР-ни Муслийманларыны дин управлениясыны председателини орунбасары Мисирланы Хызыр, Огъары Малкъарны администрациясыны башчысы  Чаналаны Муса,  ол элден  Ветеранланы советини председатели  Эндрейланы  Махаудин келгендиле. Алайгъа дагъыда  ёлтюрюлген эллилени туудукълары, аладан туугъанла, жууукълары Байсылары, Глашлары, Гуммалары, Илистинлары, Къарчалары, Кильчалары, Мисирлары, Сарбашлары, Тауболатлары, Темиржанлары, Хуболлары, Цепишлары, Эндрейлары да келгендиле.

Алайда ёлгенлеге дууа тутхандыла, зикир айтхандыла, садакъа этгендиле. Битеу ол ишле бошалгъандан сора,  къонакъла, эллиле да Огъары Малкъарда жашагъан тиширыула къурагъан столла артына чакъырылгъандыла.

Ёлтюрюлгенлени жууукълары уа, бу ишни къурагъанлагъа жюрек ыразылыкъларын билдирип, ыспас этгендиле. Бютюнда уллу ыспас а  ол элли Байсыланы Харуннга этилгенди.  Байсы улу айтханнга кёре, ала  ёсюп келген тёлюге дайым айтып, ол осал ишле мындан ары бардырылмазча  билдирип турургъа керекди,-деп билдиргендиле бизге Черек районну администрациясыны пресс-службасындан.