Токну къоркъуусуз хайырланырча

«Каббалкэнерго» предприятияны Бахсан районда бёлюмюню специалистлери электрокюч бла байламлы кезиулю дерсни «Радуга» санаторийде бардыргъандыла. Анда солугъан сабийле бла бирге ала токну къоркъуусуз хайырланыуну юсюнден элберлеге тюз жууапла табаргъа кюрешгендиле.

Энергетикле электрокюч приборла къалай ишлегенлерини, алагъа суу къоллары бла тиерге, къоркъуулу жерлеге жууукълашыргъа да жарамагъаныны юсюнден хапарлагъандыла. Андан сора да, сабийлеге оборудованияны юсюнде эсгертиу белгиле не затны ангылатханларын билдиргендиле.

Ток ургъан адамгъа биринчи болушлукъ къалай берилирге кереклисин «Гоша» деген тренажёр-роботну юсюнде кёргюзтгендиле. Бу затха сабийле уллу сейир этип къарагъандыла, энергетиклени энчи аякъ кийимлерин эмда къол къапларын кийип кёргендиле. Ахырында къонакъла алагъа тюрлю-тюрлю басма материалла юлешгендиле.

Омарланы Мурат хазырлагъанды.
Поделиться: