Жангы, хайырлы тюрлениуле

Къабарты-Малкъар къырал аграр университет «Эл мюлкню, прикладной биотехнологияны эмда промышленность производствону айнытыуда эм магъаналы жолла» (AgroBioTech-2021) халкъла аралы илму-излем конференцияны къурагъанланы санына киреди. Ол алгъаракъда онлайн халда ётгенди. Аны ишине Россейден, Беларусьдан, Армениядан билим бериу эмда илму-излем учрежденияла къатышхандыла.

Вуздан билдиргенлерича, конференцияда саулай жер башында эл мюлк, биотехнология эмда промышленность бёлюмледе къаллай тюрлениуле боллугъуну юсюнден сёлешгендиле. Алимле алада инновациялы технологияланы къыйматлы сингдириу эмда предприятияланы ышаннгылы айнытыу жаны бла оюмларын билдиргендиле. Конференцияны материаллары халкъла аралы илму басмалада чыгъарыкъдыла, «Scopus» эмда «Web of Science» информациялы базалагъа да тюшерикдиле.