КъМКъУ-да Битеуроссей илму конференция ётерикди

Къабарты-Малкъар къырал университетде «Жаш алимлени къыйматлы, жангы проектлери» деген VIII битеуроссей илму конференция ётерикди. Анга студентле, аспирантла эм жаш алимле къатышырыкъдыла, деп билдириледи вузну сайтында.
- Конференция: физика, математика эм информация, химия,  материалланы юсюнден илму,  биология, экология, медицина, информациялы технологияла, эсеплеучю техника, машиностроение, инженер механика бёлюмледен къураллыкъды. Аны чеклеринде 2018 жылда «Жаш тёлю илму-инновациялы конкурсха къатышхан» (У.М.Н.И.К. 2018)  программагъа кёре ахча саугъагъа КъМР-ни жаш алимлерини арасында эм иги инновациялы проектлени  конкурсу бардырыллыкъды.  Анга 18-30-жыллыкъла, ол санда студентле, аспирантла эм жаш алимле, къатышырыкъдыла.

Ишле  быллай тематикала бла байламлы болургъа керекдиле: информация технологияла, келир заманны медицинасы, бюгюннгю материаллары эм аланы къурау бла байламлы технологияла, жангы приборла бла аппарат комплексле, биотехнологияла. 
Конференцияны РФ-ни Билим бериу эм илму министерствосу, Россейни мурдорлу илмула жаны бла тинтиуле бардыргъан фонду,  КъМР-ни Жарыкъландырыу, илму эмда жаш тёлюню ишлери жаны бла министерствосу эм КъМКъУ бардырадыла.