Электрокюч ючюн борчлары ёсе барадыла

Къабарты-Малкъарда жашау журт-коммунал мюлк жаны бла биригиулени электрокюч ючюн борчлары квартал  сайын ёсгенлей барыды.  Алай бла бюгюнлюкде аланы саулай «Россети Северный Кавказ» Каббалкэнерго» компаниягъа  202 миллион сом берликлери барды.  

Бусагъатда республикада кёп фатарланы жумушларына къарагъан управляющий компанияла борчларыны жаланда тёрт процентин тёлегендиле. Ол былтыр бу замандан онбеш процентге азды.

Аны бла бирге быйыл августха бла октябрьге чыгъарылгъан эсеплеге кёре электрокючню  211 миллион сом багъасына хайыраланнгандыла.  Ол себепден бусагъатда 202 миллион сом борч этилгенди. Аны асламысы  суу эм жылыу бла жалчытхан компаниялагъа жетеди. Сагъынылгъан кезиуге предприятияла 3,5 миллион сомну неда 4,6 процентни жабалгъандыла.

Ток ючюн тёленирге керек 200 миллон сомдан 137 миллионну суу бла жалчытхан предприятияла тёлерге тийишлидиле. Кёп жылланы ичинде уллу борчла этип  жабалмагъанланы биринчи  тизмесинде  Нальчикде «Водоканалны» бла  «Нальчикни жылыу бла жалчытхан компаниясын» айтыргъа боллукъду. Бюгюнлюкде аланы 84,5  эм 63 миллон сом берликлери   барды.

Эсге сала айтсакъ, ахчаны заманында эм толусунлай тёленмегени ток бла качестволу жалчытыугъа чырмау салыргъа боллукъду. Энергокюч компания борчлу организацияладан  тёлеулени  барырларын излегенликге, аланы кёбюсю  административ жаны бла жууупха тартылмасала, ангыламайдыла. Аны ючюн, энергетикле болумну иги жанына тюрлендирирча, муниципалитетлени башчыларындан да себепликни излейдиле.