КъМР-ни Башчысы коронавирусха къажау ревакцинацияны ётгенди

Аны юсюнден республиканы оноучусу социальный сетьде Инстаграмны энчи бетинде жазгъанды. «Бюгюн коронавирусха къажау ревакцинацияны ётгенме. Дарманны биринчи кере салдыргъандан сора иги кесек заман ётгени себепли, «Спутник V» вакцинаны этдиргенме. Ауругъанланы саны  бир кесекге азыракъ болгъанлыкъгъа,  республикада эпидемиология болум алыкъа игиленмегенди, къайгъылыды. Ол себепден  коронавирус инфекциядан   къорууланыргъа эм аурусанг, ол къыйын ётмез ючюн,  жангыз амал,  кезиуюнде дарманны салдырыуду».

КъМР-ни Башчысы республикада жашагъанлагъа дарман салдырыгъыз деп чакъыргъанды:  «Вакцинацияны  сизге тап заманда ётерге чакъырама. Эсигизге салайым, республикада 80-ден аслам дарман салдыргъан жер барды! Кесигизни эм жууукъ адамларыгъызны сакълагъыз».

Республикада эпидемиология болумну юсюнден Казбек Коков былай айтханды: «Биз  ауругъанланы эм больницада жатханланы саны бир кесекге аз болгъанын эслегенбиз. Ол эки ыйыкъ каникулла болгъаныны эм ишлемей тургъан кюнлени эсебинденди. Госпиталлада шёндю 1141 адам болушлукъ алады, бир ыйыкъ алгъа уа 1445 саусуз бар эди. Ол себепден больницалада болум бир кесекге игиленнгенди». 

Дарман салдырыуну юсюнден Казбек Коков  былай айтханды: "Вакцинацияны кёрюмдюлери регионда кёбейгендиле, аны биринчи компонентин 246 668 адам ётгенди, толусунлай дарман салдыргъанланы саны 162 504 инсан болады". Аны бла бирге, Башчы белгилегенди, ол кёрюмдю жетишмейди, эм ангылатханды, дарман салдырмагъанланы ауругъан кезиулеринде бакъгъан къыйын болгъанын.

«Арсарсыз вакцинацияны ётерге керекди, кесигизни эм жууукъ адамларыгъызны сакълар ючюн, артыкъда тамата тёлюню. Дарман салдырыу жашауугъузну сакъларгъа онг береди. Биз бу вирусха кючлю жууап берирге керекбиз - дарман салдырып», - деп чакъыргъанды Казбек Коков республиканы адамларын.

Бизни корр.
Поделиться: