Жашил театргъа тынгылы ремонт этедиле

Кавказда эки минг бла жарым адам сыйыннган Нальчикде орналгъан жангыз Жашил театрны быйылгъы жылда жангыртып бошарыкъдыла. Ол ишле Къабарты-Малкъар Республиканы 100-жыллыгъына хазырланыу бла байламлы чекде  бардырыллыкъдыла.

Театрны 1957 жылда Къабарты-Малкъар Россейге къошулгъаны бла байламлы 400 жыл болгъанында ишлегендиле. Ол кеси да Нальчик курортну белгили жерлерине саналады. Республикагъа келген къонакъла эм мында жашагъанла да артыкъ бек сюйген, жайда концертле кёргюзтген майданладан бириди. Анда дуниягъа айтылгъан жырчыла фахмуларын кёргюзтгендиле эм республикалы даражада кёп уллу  байрамла ётдюрюлгендиле.

Шёндю аны тёгерегинде тротуар плитканы алышындыра турадыла, къонакъланы алыучу отоуда къурулушчула женгил ремонт этедиле.

Мекямны тышында сюртюу-бояу ишлерин, тапкаларыны ремонтун, башын жабыу эм къалауурла туруучу отоуну да жангыртып бошагъандыла.

 Жашил театргъа кирген эшиклени ремонт эм боягъан да этгендиле.  Битеу белгиленнген ишле быйылгъы жылны ахырына тамамланырыкъдыла,деп билдиргендиле республиканы оноучусуну пресс-службасыны келечилери.

Эсигизге салайыкъ, 2018 жылда Россейни Президенти Владимир Путин Къабарты-Малкъар Республиканы 100 жыллыгъын белгилеу бла байламлы указгъа къол салгъан эди, асламлы байрамла 2022 жылда сентябрьде бардырыллыкъдыла.

Программагъа кёре, Москвада Къабарты-Малкъарны маданият кюнлери боллукъдула, тюрлю-тюрлю  майданлада кёрмючле, концертле, конференцияла, турист фестивалла эм жаш тёлю этнография форумла ётерикдиле.