Информация байламлыкъланы жюрютюу соруулагъа къарагъандыла

КъМР-ни Башчысы Казбек Коков Москвада  РФ-ни къоруулау министерствосуну  «Россей Федерацияны къоруулау жаны бла борчланы тамамлагъанда ведомстволу аралы информация жюрютюу системаны хайырланыу»  деген жетинчи ведомстволу аралы илму-практика конференцияны ишине къатышханды, деп билдиргендиле республиканы оноучусуну пресс-службасындан.

Россейни къоруулау министри армияны генералы Сергей Шойгу былай айтханды: «Нацизмни  жигитликге санау, тарыхны жангыдан жазыу, совет халкъны жигитлигин сансыз  этиу эм фашизмни хорларгъа салгъан къыйынын ангылаусузлукъ, ма аллай затла бла биз терк-терк тюбешебиз. Жарсыугъа,  ол жаны бла жыл сайын болум осалгъа кете барады эм ол соруулагъа артыкъ да уллу эс бурургъа керекди».

Сергей Шойгу Экинчи дуния урушну тарыхын унутмай сакълау жаны бла ишлеген тынч болмагъанын да белгилегенди. «Бизге ол уруш не заманда да, Уллу Ата журт ючюн бардырылгъан урушлай къаллыкъды», - деп чертгенди министр. Сергей Шойгу Россей Федерацияны бир къауум субъектин, министерстволарын эм ведомстволарын  къыралны къоруулау жаны бла ведомстволу аралы байламлыкъланы къурауда болдургъан жетишимлери ючюн белгилегенди.