Къабарты-Малкъарда билим бериуге цифра технологияла сингдириледиле

Россейни Правительствосуну Председателини орунбасары бла КъМР-ни Башчысы Казбек Коков «ITV Group» компанияны регион бёлюмюнде болгъандыла, деп  билдиргендиле республиканы оноучусуну пресс-службасыны келечилери

 Къабарты-Малкъар Республикада ITV Group къырал-энчи иели мюлк  жюрютюуню чеклеринде школчулагъа деп къошакъ халда билим бериу программаны бардырады, IТ-компанияны эм билим берген биригиулени специалистлерин хайырланады. ITV Group компанияны болушлугъу бла республикада билим берген учреждениялагъа IТ-технологияланы сингдириу иш тийишлисича бардырылады. Сёз ючюн, 2018 жылда Къабарты-Малкъарда «Мен программистме» деген кадрланы хазырлау программа башланнган эди. Жыл сайын ол программа бла 13 жылдан абадан 50 сабий къошакъ халда билим алады, келе тургъан юч жылны ичинде окъугъанланы санын 200 жетдирирге мурат барды.

КъМР-ни Башчысы майда этген Посланиясында IТ-технологияланы айнытыу экономиканы инвестицияла бла айнытыу бёлюмюнде магъаналы жерни тутханын эм къыралны жанындан болушлукъ керек болгъанын белгилегенди. КъМР-ни Башчысы Казбек Коковну болушлугъу бла «Мен- математикме» программа ишин башлагъанды, анга республиканы муниципал районларыны 17 школу къошулгъанды. Бюгюнлюкде ол программа бла 1500 сабий окъуйду. 2022 жылдан тебиреп Къабарты-Малкъар къырал университетде компьютер технологияланы эм жалгъан интеллектни институту ишлеп башларыкъды.

Андан сора республикада  билим берген программаланы бардырыргъа майданла ачаргъа эм республикада эм уллу IТ компанияны айнытыргъа IТ-кластер къураргъа мурат барды. Аны хайырындан аллай иш бла кюрешген гитче компанияланы  кёллендирирге эм профессионал къауумланы бирикдирирге боллукъду.

Компания 2003 жылда къуралгъанды, шёндю аны битеу дунияда 50 бёлюмю барды, аладан 11 офиси Россейде орналыпдыла. 2008 жылда компания кесини эм баш продуктун – видеоаналитика амалы болгъан цифралы платформаны къурагъанды. Жангы программаны хайырындан бирикген комплексли системала жарашдырыргъа, аланы от тюшгенден сакълагъан системалагъа, касса терминаллагъа, адамны ким болгъанын таныгъан эм къырал номерлени белгилерин окъугъан системала къураргъа онг чыкъгъанды.

Компания Къабарты-Малкъарда «Къоркъуусуз республика»  проектни ишлегенди, аллай системала кёп россейли шахарлада къуралгъандыла. 20213 жылда компания россейли рынокну 60 процентин алгъанды. Бюгюнлюкде анда 500 ишчи барды, аладан 380 Россей Федерациядандыла, ол санда 160 -Нальчикден. 2021 жылда компанияны иш хакъ тёлеген фонду 100 миллион сомдан атлагъанды.

Шёндю ITV Group- Россейде эм дуния рынокда видео бла къарагъан эм къоркъуусузлукъну жалчытхан инновациялы системаланы этген компанияды. Ол кеси да 100 процент таза россейли компанияды, аны продуктлары уа программа бла жалчытхан россейли производительлени реестрине киреди.

Александр Новак цифралы технологияланы хайырланыуда компанияны ишине бийик багъа бергенди, андан ары да жетишимле болдурургъа тежегенди.

  Бизни корр.