Юйлеге газ ызланы тартып бошаргъа жораланнган жыйылыу болгъанды

Россейни Правительствосуну Председателини орунбасары Александр Новак эм КъМР-ни Башчысы Казбек Коков да къатышып Къабарты-Малкъарны шахарларында эм эллеринде газ ызланы айнытыугъа жораланнган жыйылыу болгъанды.

Жыйылыуда шахарлада бла элледе табийгъат газ тартылмай тургъан юйлени чеклерине дери газ келген быргъыланы 2023 жылгъа дери тартып бошаубла байламлы Россей Федерацияны Президенти Владимир Путинни Посланиясында берилген буюуруулары къалай толтурулгъанларына къаралгъанды, деп билдиргендиле республиканы оноучусуну пресс-службасыны келечилери.

Казбек Коков белгилегеннге кёре, Къабарты-Малкъар Республиканы юйлеге табийгъат газны тартылыуу бла бийик кёрюмдюсю барды, газ баргъан быргъыла битеу муниципал къуралыулада эм бек узакъда орналгъан элледе да бардыла.

 «Къабарты-Малкъар Республика айный барады, жашау журтла ишленедиле, жангы микрорайонла къураладыла, ол себепден газ быргъыланы тартыу энтта да бардырылгъанлай турады.

Республикада газ ызланы тартыу иги кесек юйге алыкъа проблема болгъанлай эм социал жаны бла да магъаналы, тамамларгъа керекли болуп тургъан соруулай къалады. Аланы оноуу  РФ-ни Президенти Владимир Путинни буюрууларына кёре этилликди», - дегенди КъМР-ни Башчысы Казбек Коков.

Республикада элледе газ быргъыланы тартыу эм ызланы айнытыу бла байламлы Правительствону Председатели Мусукланы Алийни башчылыгъында республикалы штаб къуралгъанды. Регионда газ быргъыланы тартыу жаны бла   «Газпром газификация» акционер общество ишлейди, эм табийгъат газны юлешген «Газпром газораспределение Нальчик»  деген акционер общество барды. Аны муниципал къуралыулада бёлюмлери ишлейди.

Къабыл этилген график-планнга кёре, 1122 юйге газ тартылыргъа керекди, жылны ахырына дери 77 элде орналгъан 330 юйге ол жумуш этилликди, къалгъан юйлеге 2022 жылда  табийгъат газ тартыллыкъды.

Андан сора отлукъ -энергетика таплыкъны тохташдырыу бла байламлы проектни хазырлауда КъМР-ни Правительствосуну буйругъуна кёре, ведомстволу аралы комиссия къуралгъанды. Шёндю жыйыла тургъан билдириуле тинтиледиле, анализ этиледи. Отлукъ-энергетика  таплыкъны тохташдырыуну проекти  быйылгъы жылны ахырына къураллыкъды.

Жыйылыугъа РФ-ни экономиканы айнытыу министрини орунбасары Сергей Назаров, КъМР-ни Правительствосуну Председатели Мусукланы Алий, аны биринчи орунбасары Сергей Говоров, КъМР-ни промышленность, энергетика эм сатыу-алыу министри Шамиль Ахубеков, Тарифле эм  жашау журтлагъа надзорлукъ этиу жаны бла Къырал комитетни таматасыны къуллугъун толтургъан Алим Макуашев, КъМР-ни экономиканы айнытыу министри Рахайланы Борис, РФ-ни Правительствосуну Председателини орунбасарыны секретариатыны оноучусуну орунбасары  Георгий Нозадзе, «Газпром» 313 акционер обществону департаментини таматасы Владимир Марков, аны орунбасары Александр Ерков,  «Газпром межрегионгаз» акционер обществону регионла бла эм власть органла бла ишлеу жаны бла генеральный директорну орунбасары Денис Волков, «Газпром газораспределение Нальчик» акционер обществону толтуруучу директору Залим Вороков, ВКС амал бла  Федерал антимонопольный службаны таматасыны орунбасары Виталий Королёв эм РФ-ни энергетика министрини орунбасары Павел Сорокин къатышхандыла.