Тышына аслам алма жиберилгенди

Россельхознадзорну Шимал Кавказда регионла аралы управлениясыны тергеулерине кёре быйыл Къабарты-Малкъардан бирси регионлагъа 46 мингден аслам тонна жемишле эмда наныкъ продукция жиберилгенди. Аны кёп къалмай бары да (45 минг тонна) алмаладыла. Бу кёрюмдю, озгъан жылны ол кезиую бла тенглешдиргенде, 26,5 процентге кёбейгенди, дегендиле ведомствода.

Сагъынылгъан продукция асламысында Москва, Ленинград, Новосибирск, Свердлов, Нижегородск областьлагъа, Татарстаннга эмда Москва бла Санкт-Петербург шахарлагъа жиберилгенди. Ол бары да фитосанитария контрольну ётгенди. Россельхознадзорну Къабарты-Малкъарда Референт арасыны специалистлери хар партиядан да бир кесегин алып, лабораторияда кёп тюрлю кёрюмдюлеге тинтгендиле. Бу ишни эсеплерине кёре, продукцияны бары да таза болгъаны эмда белгиленнген излемлеге келишгени тохташдырылгъанды.