Май районну айнытыу планы жарашдырылгъанды

Россейни Правительствосуну Председателини орунбасары Александр Новакга Къабарты-Малкъарда эки кюнню ичинде бардыргъан жолоучулугъунда Нальчик шахарны Май микрорайонуну айнытыу планын кёргюзтгендиле, деп билдиредиле республиканы оноучусуну пресс-службасыны келечилери.

 Кёргюзтюуню Нальчикни 33 номерли школунда бардыргъандыла - ол жангы микрорайонну биринчи социал объектиди, кеси да «Билим бериу» деген миллет проектни чеклеринде 2019 жылда хайырланыргъа берилгенди. 

КъМР-ни Башчысы Казбек Коков шахарны районларында ишленирик жашау журтланы проектлери къалай къуралгъанларыны юсюнден айтханды: бек алгъа проект адамланы излемлерин жалчытыргъа керекди, андан сора да, анда хар зат да эсге алыныргъа тийишлиди, башхача айтханда, бир жерде социал магъаналары болгъан учрежденияла ишленирге керекмейдиле. Май микрорайонну къурулушун комплексли бардырыу шахарны экономикасын айнытыу проектлеге саналады.

Андан сора да, КъМР-ни Башчысы шахарны орамларында аслам халда тынгылы ремонт этилгенин билдиргенди, ол иш шёндю да бардырылады, келир жылда тамамланырыкъды. Къабарты-Малкъарны 100-жыллыгъына Кабардинская,  Шогенцукова, Ленина, Кулий улу атлы проспектле жангыртыллыкъдыла, адамла солуучу жети жер тапландырыллыкъды.

Нальчикни жер-жерли администрациясыны  таматасы  Таймураз Ахохов, объектлени юсюнден жарашдырылгъан проектге кёре, энчи билдириуле этгенди.

Жангы микрорайонну ёлчеми, ол шахарны ортасындан эки километр узакълыкъдады, 15, 5 гектар жерни алады. Ары салынырыкъ капитал салымланы ёлчеми 10 миллиард сомдан аз тюйюлдю. Проектге кёре, 9-12 этажлары болгъан шёндюгю излемлеге келишген фатарла ишленирикдиле. Алада, бек аздан, 4230 адам жашарыкъды. Алайда 390 жерге эки сабий сад, сменагъа 150 кере барыргъа поликлиника, физкультура-спорткомплекс, сабийле ойнаучу тынгылы жер эм  скейт-парк боллукъду.

Микрорайонну инфраструктура айныуу бара турады. Мында суу быргъыла тартылгъандыла, шахар скверни ишлегендиле, «Къоркъуусуз качестволу автомобиль жолла» деген миллет проектге кёре, Киров эм Тлостанов орамла жангыртылыннгандыла, Тарчоков орамда тынгылы ремонт барады.