Чегемни Маданият юйюнде дарман салдыргъан жер ачылгъанды

Чегем районда коронавирус ауруугъа къажау дарман салдырыу кюч ала барады, деп билдиргенди КъМР-ни Правительствосуну порталы.

 Адамлагъа таплыкъгъа деп вакцинацияны медицина учрежденияланы, больницаланы энчи кабинетлеринден сора да жарашдырылгъан мобиль жерледе ётерге да боллукъду.

Аллай пунктну Чегемни Маданият юйюнде ачхандыла. Мекям районну тау эллеринден келгенлеге да вакцинацияны  терк ётерча тап, автобусла тохтаучу жерден узакъ болмай орналыпды.  Ол себепден,  халкъ асламла медицина учреждениялагъа кире турмагъанлай,   бу амал бла хайырланыргъа да боллукъдула, деп айтылады билдириуде.

Анда дарман салдырыргъа керекли хар зат да медицина излемлеге кёре къуралгъанды, ол санда вакцинаны сууукъ жерде сакълау эм аны бир-жерден башхасына элтгенде да, ол жумушну    тийишлисича тамамлайдыла.

 Дарман салдырырдан алгъа, адаманы саулугъуна къарайдыла, къан басымын эм сатурациясын  ёнчелейдиле.

«Бюгюнлюкде коронавирсха къажау дарманны Чегем районда 16 мингден аслам адам ётгенди, ол кёрюмдю 55 процент болады эм биргелей иммунитетни тутаргъа керекли чекге жетгенди»,- деп белгиленеди билдириуде.

Бизни корр.

Поделиться: