Къабарты-Малкъар жолланы ишлеую бла алчыланы санындады

«Къоркъуусуз тынгылы жолла» деген миллет проектни жашауда бардырыуда болдургъан жетишимлери бла эм 2021 жылны кёрюмдюлерине кёре, Къабарты-Малкъар Республика Россейни Правительствосуну дипломуна эм эсде къалгъан саугъасына тийишли болгъанды.

Тюнене Москвада   КъМР-ни Башчысы Казбек Коков Россейни Правительствосуну вице-премьери  Марат Хуснулин башчылыкъ этип бардыргъан семинар-жыйылыугъа къатышханды. Анда 2030 жылгъа дери къурулуш бёлюмню эм жашау-коммунал мюлкню айнытыу соруулагъа къарагъандыла.

 Семинаргъа къатышханлагъа алгъыш сёзню РФ-ни Президентини Администрациясыны Башчысыны биринчи орунбасары Сергей Кириенко айтханды. Россейни Президенти Владимир Путин бу бёлюмге салгъан магъаналы борчладан бири, жашау-коммунал мюлкде эм жолланы ишлеу жаны бла инфраструктура проектлени тынгылы бардырыуду.  

Жыйылыугъа РФ-ни къурулуш эм жашау-мюлк министри Ирек Файзуллин, РФ-ни Президентини болушлукъчусу Михаил Орешкин, РФ-ни Главгосэкспертизасыны таматасы  Игорь Манылов, Москваны мэри Сергей Собянин, регионланы башчылары, предприятияланы бла   вузланы алчы специалистлери къатышхандыла.

Марат Хуснулин къурулуш бёлюмню бла жашау-коммунал мюлкню айнытыу стратегиясын кёргюзтгенди, ол анда регионланы магъаналылыкъларын белгилегенди эм бёлюмню айнытыу  амалларын билдиргенди.

Семинар-жыйылыуну чеклеринде «Къоркъуусуз тынгылы жолла» деген миллет проектни бардырыуда алчы регионланы саугъалагъандыла. Аны Россейде жыл сайын  транспорт бёлюмде белгилениучю «Транспорт ыйыкъгъа» жоралагъандыла.

Белгилени бир къауум кёрюмдюлеге кёре салгъандыла: проект ишлени тинтиу, къалай этилгенине къарау, шёндюгюлю технологияланы хайырланыу, жоллада къоркъуусузлукъну жалчытыу жаны бла бардырылгъан ишле,  этилген келишимлени толтурулуларына эм жамауат бла байламлыкъ къалай жюрютюлгенине къарау.

 «Къоркъуусуз эм тынгылы жолла» деген миллет проектни  бардырыуда      аламат кёрюмдюле болдургъаны ючюн,  Къабарты-Малкъар Республика 2021 жылны эсеплерине кёре Россейни  Правительствосуну дипломуна эм эсде къаллыкъ саугъагъа тийишли болгъанды.

Алчыланы санында дагъыда Адыгея бла Татарстан, Белгород, Курск, Липецк, Мурманск, Оренбург, Пенза эм Тула областьла бардыла.

Саугъаланы Сергей Кириенко бла Марат Хуснулин эм РФ-ни Президентини болушлукъчусу   Игорь Левитин бергендиле.

Къабарты-Малкъарда ремонт этиле тургъан 183 жол объектде 170 толусунлай ишле бошалгъандыла, къалгъанларында техника жаны бла хазырлыкъ 92 процентни тутады.

Регионла аралы эм жер-жерли 116 километр автомобиль жол  тап халгъа келтирилгенди, 37 километр жол ызда чыракъла жанарча этилиннгендиле, къоркъуулу болгъан жерлеге темир чалдишле салыннгандыла, жангы миллет стандартлагъа  кёре 116  адамла жолладан ётген жерле жарашдырылгъандыла.

Магъанасына кёре семинар  бир ненча майданда бардырылгъанды: административ тыйгъычланы кетериу эм инвестиция-къурулуш ишни  къысхартыу, жашау-коммунал мюлк: къайгъыла эм аланы тамамлау жоллары,  шахар жолланы инфраструктурасын тапландырыу, жангы жашау онгла, къурулушну бардыргъан биригиулени къыйматлылыкълары эм башха магъаналы бёлюмледе,деп билдиргендиле КъМР-ни Башчысыны бла Правительствосуну пресс-службасындан.