Нальчикни шахар маршрутларын жангы автобусла жалчытырыкъдыла

Нальчикде 14 ноябрьден 15 ноябрьге кечеде муниципал троллейбус управленияны тийресинде тургъан «ПАЗ» автобусла кюйгендиле. Алай бла 14-чю номерли пассажир маршрутну жалчытхан 7 «ПАЗ» автобус жаннганды.

- 14-чю номерли маршрутну иши толусунлай жангыдан къуралгъанды, - деп билдиргенди Нальчик шахар округну жер-жерли администрациясыны таматасы Таймураз Ахохов. – Биз пассажирле къыйналмазча эм апчымазча, юйреннген маршрутлары бла барырча болжалгъа салмай онг этгенбиз. 16 ноябрьни эрттенлигинден «Нальчикский транспорт» МУП-ну къолайлыгъындан автобусла 14-чю маршрутда жюрюйдюле, алгъынча аны 11 «ПАЗ» автобус жалчытады.

«Болумну право сакълаучу органла тинтедиле, ала жууукъ заманда  аны сылтауларын белгили этериклерине ышанама», - деп белгилегенди ол.

Нальчик шахар округну жер-жерли администрациясыны таматасы Москваны Правительствосу алгъаракълада берген 15 автобусдан сора да шахар пассажир транспорт парк озгъан ыйыкъда энтта да 20 толу размерли автобусла бла толтурулгъанын билдиргенди.  Документлени жарашдырыу бардырылады, жууукъ заманда ала шахар маршрутлагъа чыгъарыкъдыла.

Таймураз Ахохов битеу жамауат транспорт сеть жангыртыллыгъын да айтханды. «Жууукъ заманда кёп адам сыйыннган толу размерли автобуслагъа кёчер мурат барды. Битеу муниципал транспорт безналичный халда тёлеу терминалла бла жалчытылынырыкъды эм «Тройка» карта сингдирилликди, ол а инсанланы бир-бир къауумларына улоуда баргъаны ючюн тёлеген ахчаны азайтырыкъды», - деп къошханды Ахохов.

Поделиться: