Ариулукъну чакълары

Бу кюнледе уа Нальчикде  Владимир Вороков  атлы маданият   фондда  къууанчлагъа кийилген жыйрыкъланы кёрмючю  болгъан эди. «Той эмда башха къууанчлагъа,  ингирлеге  кийилген  жыйрыкъла» деген кёрмюч битеу эпидемиология чеклениулени низамын сакълап бардырылгъанды.

«Кавказда юйюр къураугъа, тойланы эмда къурманлыкъланы бардырыугъа уллу жууаплылыкъ бла къарагъанларыны не жашырынлыгъы барды. Аны бла байламлы малкъарлыланы бла къабартылыланы миллет энчиликлерин эм башха салып, юйюр  къурауну магъанасын асламланы араларында кенг жайыуну да унутмагъанбыз»,-дейди  фондну  председатели Люаза Макоева.

Бу сейирлик байрамны уа бизге  «Фатишайин»,  «Фашион клуб», Нальчикде болгъан бир къауум   миллет-маданият   арала къураргъа болушхандыла. Аны бла бирге фондну залларында  омакъ  той  жыйрыкъла,  флористлени, декораторланы, байрамланы  къураучу агентстволаны, дагъыда кёп башха ууакъ-тюек затчыкъланы  кёрмючю  къуралгъан эди.  Аланы белгили дизайнерле: Шакъманланы Фатимат,  Амина Бекулова,  Махачкъаладан  «Церемония», Владикавказдан  «Мишель»  салонла келтиргендиле. 

Нальчикчи  дизайнерлени ингир жыйрыкъларына  ким да  эс бурмай къаллыкъ тюйюл эди. Къысха айтханда, кёрмючню  къурагъанла хар затны да эсге алып, кеслерини къол къыйынларын  адамлагъа туура этер онг тапхандыла.

-Быллай кёрмючню биз биринчи кере къурагъанбыз. Жарсыугъа, кёп адам келип кёралмагъанды бу сейирлик затланы, ол жаланда  беш кюнню ичинде баргъанды.  Болсада, аберилерин бери келтирип, кёргюзтгенле бла келишим этгенбиз,  ала  пандемия бошалып,  жашау  алгъыннгы  эбине келсе, андан да кёп жыйрыкъла, дизайнер ишле, дагъыда алагъа ушаш затла келтирликдиле. Бу  жол ала  сынау халда  келгенлерин да чертирге тийишлиди ,-дегенди  Люаза  Макоева.

Холаланы Марзият.
Поделиться: